Portugalia në vitin “zero” – “Fitch” paralajmëron një notë investimesh për borxhin

Portugalia pret që vlerësimi për borxhin e vendet të kthehet shumë shpejt në nivelin e investimit, madje edhe më shpejt se ç`presin tregjet.

Ky optimizëm vjen menjëherë pasi agjencia e vlerësimit, Fitch, rishikoi perspektivën e borxhit të vendit në pozitive, nga e qëndrueshme që ishte më parë.

Pavarësisht kësaj, Fitch ruajti të pandryshuar notën, në një nivel poshtë atij të investimit, që do ti mundësojë Portugalisë një akses më të madh në tregje, por edhe kosto më të ulta të huamarrjes.

Portugalia është ndoshta shembulli i vetëm i suksesit të masave shtrënguese dhe planit të shpëtimit në Europë. Vendi jo vetëm po rritet me ritme të shpejta, por prej 3 vitesh arrin të shlyejë detyrimet ndaj kreditorëve edhe më shpejt se afatet e skadencës, duke reduktuar kështu kostot e huamarrjes.

Ishte vetë ministri portugez i financave ai që deklaroi se, Portugalia do të fitojë më shpejt se ç`pritet notën e investimeve.

Qeveria pret që kjo gjë të ndodhë brenda disa javëve. Fitch aktualisht e vlerëson borxhin e vendit në BB+, në të njëjtin nivel me Moody`s dhe Standart and Poor`s dhe mund të bëhet e para agjenci që më në fund ndërmerr hapin e shumëpritur, që praktikisht e kthen Portugalinë në vitin zero, pas krizës së rëndë financiare dhe ekonomike.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.