Portugalia shet “Novo Banco” – Lone Star do të zotërojë 75% të bankës që dështoi në 2014
Portugalia ka pranuar të shesë 75% të pronësisë në huadhënësin e shpëtuar nga shteti, Novo Banco, drejt firmës amerikane të manaxhimit të aktiveve, Lone Star, në këmbim për një ineksion kapitali prej 1 miliardë euro drejt institucionit.
Kryeministri Antonio Costa tha se shitja ka përmbushur një nga kriteret kyç për të mos zgjeruar garancitë shtetërore drejt blerësit.
“Kjo lëvizje ka përmbushur nevojën për likuiditet të huadhënësit dhe vazhdimi i Novo Banco në financimin e ekonomisë është i garantuar. Nuk ka ndikim të drejtpërdrejt apo indirekt në llogaritë publike, apo te taksapaguesit”, thotë kryeministri. Guvernatori i Bankës së Portugalisë, Carlos Costa tha se shitja është një hap i rëndësishëm për stabilitetin e sistemit bankar.
Nën marrëveshjen, “Fondi për Rezolucion” i bankës së Portugalisë do të mbajë 25%-shin e mbetur të pronësisë te Novo Banco. Ky fond përbën institucionin ndërmjetës që mundësoi themelimin e Novo Banco nga huadhënësi i trazuar Banco Espirito Santo, që dështoi në vitin 2014.
Nën kushtet e marrëveshjes, kompania amerikane do të injektojë 750 milionë euro kur dakordësia të përfundojë dhe një shumë tjetër prej 250 milionë brenda 3 vitesh.
Shitja përbën përfundimin e një procesi të gjatë që filloi me shpëtimin emergjent të Bankës Espirito Santo, që ishte dikur huadhënësi më i madh i listuar në bursë i Portugalisë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.