Post-zgjedhje, Bankat “plasin” nga depozitat – Stoku total rritet me 300 milionë dollarë në fund të qershorit krahasuar me marsin
Ndërsa treguesit e sistemit bankar në përgjithësi kanë shënuar trajektore pozitive gjatë tremujorit të dytë të këtij viti, janë depozitat ato që kanë shënuar një rritje të pazakontë, duke u shtuar me plot 300 milionë dollarë me përfundimin e zgjedhjeve të 25 prillit. Banka e Shqipërisë raporton se Në fund të muajit qershor, stoku total i depozitave rezulton të jetë shtuar me rreth 30 miliardë lekë, afërsisht 300 milionë dollarë, nga muaji mars. Depozitat e bizneseve, të cilat përgjithësisht shfaqin sjellje më të luhatshme krahasuar me ato të individëve, kanë shënuar rritje të konsiderueshme – me mbi 13 miliardë lekë –veçanërisht në muajt maj dhe qershor. Ndër të tjera, kjo ecuri lidhet me pagesat e qeverisë për rimbursimin e TVSH-së së prapambetur në kohë, si edhe për kryerjen e shpenzimeve të lidhura me aktivitetin e sektorit publik.
Të dy këto zhvillime lidhen në mënyrë të drejtpërdrejtë me zgjedhjet e përgjithëshme të 25 prillit, përpara të cilave Qeveria rriti shpenzimet publike, por edhe rimbursoi TVSH-në e prapambetur për thuajse të gjitha bizneset ndaj të cilave ishte debitore.
Megjithatë, Banka e Shqipërisë thekson se depozitat e individëve vijojnë të mbajnë kontributin kryesor në zgjerimin e depozitave në sistemin bankar, me një rritje prej rreth 18 miliardë lekësh gjatë kësaj periudhe.
Në terma të strukturës kohore, rritja e depozitave të bizneseve merr përgjithësisht formën e llogarive rrjedhëse dhe depozitave pa afat. Depozitat e individëve, të cilat kanë maturitet më afatgjatë, në prani të normave të ulëta të interesit, vijojnë të zhvendosen drejt depozitave pa afat, si në Lek dhe në valutë. Depozitat pa afat dhe llogaritë rrjedhëse në sistemin bankar përbëjnë mbi 53% të stokut të depozitave totale në fund të muajit qershor. Përbërësi më likuid monetar, paraja jashtë bankave, ka shënuar gjithashtu flukse në rritje gjatë kësaj periudhe, duke reflektuar kërkesën e shtuar për mjete monetare likuide.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.