Postet kryesore në BE – Afron zëvendësimi, Gjermania nuk pritet të drejtojë BQE
Gara mes liderëve të Europës do të jetë e ashpër në 2018-ën, ndërkohë që përgatiten për të zëvendësuar pozicionet kryesore të rajonit. Kandidatët për të zëvendësuar presidentin e Bankës Qendrore Europiane, Mario Draghi, pritet të shfaqen gjatë këtij viti.
Gjermania, ka gjasa të interesohet më shumë për postin që kontrollon portofolin se sa caktimin e normave të interesit. Mandati i Draghit përfundon në Tetor 2019, në një kohë që edhe Jean Claude-Juncker dhe Donald Tusk pritet të lënë detyrën e tyre. I pari është kreu i Komisionit, që propozon ligjet e Bashkimit Europian dhe zbaton politikat e konkurrencës.
Posti tjetër është ai i presidentit të Këshillit Europian, ku vendet ndreqin axhendën e politikave të BE-së.
Ai që do t’i zërë vendin këtyre do të përcaktohet nga një serë vendimesh, ndërkohë që i pari që do të largohet është zv/presidenti i BQE, Vitor Constancio, në Maj 2018. Shtetet që kanë pak shans për të zënë vendet kryesore në Frankfurt apo Bruksel, do përpiqen të zëvendësojnë ish-guvernatorin e bankës së Portugalisë.
Nëse planet e Emmanuel Macron për krijimin e një Fondi Monetar Europian rezultojnë me sukses, do të krijonin një pozicion të ri të rëndësishëm. Kombësia do të ketë rëndësi, veçanërisht për postin kryesor të Bankës Qendrore Europiane.
Asnjë gjerman nuk ka drejtuar institucionin në Frankfurt deri më tani. Megjithatë, sipas Reuters, Gjermania mund të mos jetë shumë e interesuar për një institucion që është shumë protektiv ndaj pavarësisë, krahasuar me një pozicion që ka nën kontroll shpërndarjen e parasë.
Nëse reformat marrin vrull, ministri i financave për Eurozonën apo kreu i Fondit Monetar Europian, mund të kenë kontroll direkt mbi politikat.
Berlini mund të interesohet që një nga këto dy pozicione të zihet nga një gjerman, apo nga dikush që ka pikëpamje të ngjashme për buxhetin e balancuar. Për rrjedhojë, drejtimi i Bankës Qendrore Europiane mund të mos jetë çmimi kryesor.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.