Potenciali i turizmit dimëror – Shifrat flasin për rritje, por për të huajt oferta është vetëm në verë

Një tjetër klasifikim e rendit Shqipërinë si një ndër 10 destinacionet më të lira për vitin 2019. Klasifikimi në fjalë është bërë nga prestigjiozja britanike, “The Independent”. Shqipëria strehon disa nga plazhet më të bukura të Europës por pa shtrenjtësinë tipike të Mesdheut. Hoteli, restorantet dhe birra vlerësohen si tepër të lira, ndërkohë që rruga deri në Shqipëri vlerësohet të jetë më e vështira. Për këtë arsye, shkrimi sugjeron kalimin nga Greqia.

Pavarësisht reklamës që mbetet pozitive, por edhe sinjaleve se më shumë turistë do të vijnë, Shqipëria vijon të jetë e mbërthyer në “kurthin” e turizmit stinor. Vera mbetet muaji i vetëm ku Shqipëria ka një ofertë për të huajt. Por, edhe këtu gjërat mund të ndryshojnë. Një tjetër media prestigjioze, “10daily”, e rendit sheshin Skënderbej si një ndër 5 tregjet më të bukura të krishtlindjes në botë, krah sheshit të Milanos, apo atij të Budabestit.

Po shifrat çfarë thonë? A ka potencial dimri për t`u shfrytëzuar? Të dhënat zyrtare nga instituti i statistikave në vend tregojnë qartë se, gjatë viteve të fundit, trendi është në rritje përgjatë tre muajve të dimrit. Fluksi i turistëve të huaj që kanë hyrë në Shqipëri është rritur ndjeshëm. Në Dhjetor të 2017-ës, 257 mijë të huaj vizituan Shqipërinë, nga 225 mijë të Dhjetorit 2016, në rritje me 14%. Edhe më e madhe është rritja gjatë Janarit, ku në 2018 regjistrohen 232 mijë turistë, dhe në 2017-ën, 172 mijë, në rritje me 35%.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.