PPP-të për ndërtimin e rrugëve: 5.36 mld lekë për kontratat e nënshkruara, planet për investimet e reja
Ndërtimi i rrugëve përmes partneritetit publik-privat përfshin 4 kontrata të nënshkruara nga qeveria shqiptare. Ndërkohë që, të tjera kontrata parashikohet të lidhen në vijim, me qëllim realizimin e investimeve në infrastrukturën rrugore. Referuar të dhënave zyrtare, për vitin 2021 buxheti i shtetit parashikon të shpenzojë në total 5.36 mld lekë për financimin e këtyre kontratave, nga 3.46 mld mld lekë që u shpenzua në vitin 2020. Për vitin 2021, kosto më e lartë i takon PPP-së për ndërtimin e Rrugës së Arbrit, me një fond prej 4.1 mld lekë.
Pas saj vjen financimi i kontratës për ndërtimin, operimin dhe mirëmbajtjen e rrugës Milot-Morinë, me një buxhet të akorduar prej rreth 800 mln lekësh. Më pak të financuar mbeten 2 kontratat për rrugët Orikum-Dukat dhe Milot-Balldren, të cilat u shoqëruan me kontestime të shumta gjatë nënshkrimit të tyre, për shkak të kostove të larta për 1 km rrugë. Zyrtarisht, Ministria e Infrastrukturës dhe Energjisë ka deklaruar se punimet në aksin Orikum-Dukat kanë nisur, teksa buxheti i akorduar për këtë kontratë në 2021-in është rreth 394 mln lekë.
Ndërkaq, për aksin Milot-Baldren është parashikuar një fond prej 65 mln lekësh, por deri më tani nuk ka asnjë zhvillim konkret në këtë drejtim. Por, teksa këto kontrata janë nënshkruar, të tjera investime në infrastrukturën rrugore parashikohet të kryhen përmes partneritetit publik-privat. Një prej tyre është ndërtimi i tunelit të Llogarasë. Aktualisht, është hapur gara për të përzgjedhur kompaninë që do të ndërtojë këtë tunel, përmes një koncesioni me afat 35-vjeçar, teksa investimi parashikohet të jetë rreth 18.96 mld lekë.
Gjithashtu, një tjetër aks që do të ndërtohet me PPP është ai Milot-Fier. Për këtë rrugë, gara nuk u finalizua me sukses, pasi sipas Ministrisë së Infrastrukturës dhe Energjisë, kompania pjesëmarrëse në garë, që ishte e vetmja nuk plotësonte kriteret teknike. Gjithsesi, zyrtarisht është deklaruar se gara do të rihapet, por prej dhjetorit të vitit 2020 e deri më tani nuk ka asnjë zhvillim konkret. Shpenzimet për financimin e kontratave koncesionare do të kenë një tendencë në rritje në vitet në vijim.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.