Pr.buxheti 2022/ OSHEE parashikon 7.2 mld lekë humbje. Rishikohen skema e mbrojtjes sociale për subvencionin e energjisë

Gjatë vitit 2022, Operatori i Shpërndarjes së Energjisë Elektrike parashikon një humbje prej 7.2 miliardë lekësh. Kjo evidentohet në projektbuxhetin e vitit 2022, ku evidentohen masat që Shqipëria po merr e do të marrë për t’iu përgjigjur rritjes së çmimit të energjisë në tregjet ndërkombëtare. Në këtë listën e masave që po merren, është edhe reduktimi i pagesave të prapambetura por edhe rishikimi  skemës së mbështetjes sociale për rimbursimin e energjisë.

“Lidhur  me  parashikimet  më  të  fundit  për  vitet  2021-2022, OSHEE sh.a ka raportuar se rritja e paparashikuar eksponenciale e çmimit të energjisë në Tregun e Lirë ka ndryshuar tërësisht perspektivat e zhvillimit të aktivitetit të shoqërisë duke e bërë të padobishëm çdo parashikim të mëparshëm të kësaj shoqërie.

Mosplotësimi i planit të furnizimit me energji elektrike si pasojë e motit të thatë do të detyrojë OSHEE Group sh.a të plotësojë këtë mungesë me blerje në tregun e lirë, që do të ndikojë në ulje të performancës  financiare  dhe  mungesë  likuiditeti  të  kompanisë. 

Si  pasojë,  nga  ana  e  OSHEE  Group parashikohet një humbje financiare prej rreth 8.9 miliard LEK për vitin 2021 dhe nëse nuk merren masa të menjëhershme edhe viti 2022 do të shënojë një humbje financiare prej rreth 7.2 miliard LEK.

Me qëllim zvogëlimin e humbjeve financiare OSHEE Group sh.a është duke programuar masa të shpejta lidhur me daljen nga kjo vështirësi në mënyrë që të arritjë një performancë pozitive financiare të sektorit për përballimin e situatave eventuale të vështira në të ardhmen pa rënduar buxhetin e shtetit” shkruhet në projektbuxhetin e 2022.

Plani i masave të reduktimit të detyrimeve të prapambetura në Sektorin e Energjisë Elektrike

Në kuadër të reformës në sektorin e energjisë është ngritur komiteti “Program Steering Comittee” (PSC), i cili në muajin Dhjetor 2020, finalizoi me sukses planin e masave të miratuar me Urdhrin e Përbashkët të  Ministrisë  së  Financave  dhe  Ekonomisë  dhe  Ministrisë  së  Infrastrukturës  dhe  Energjisë  nr.304  datë 17.12.2020, për reduktimin e detyrimeve të prapambetura në sektorin e energjisë elektrike. Ky plan ofron një seri masash me qëllim parandalimin e krijimit të detyrimeve të reja të prapambetura dhe gjithashtu disiplinimin e pagesave ndërmjet kompanive të sektorit energjitik dhe palëve kryesore të lidhura me to.  Pas arritjes së një disipline të shëndetshme pagesash ndërmjet tyre, plani propozon ristrukturimin e stokut të detyrimeve dhe përdorimin e instrumentave të ndryshme favorizuese në funksion të reduktimit të këtij  stoku.

Sipas  planit  të  masave  të  miratuar,  MFE  është  angazhuar  në  mënyrë  të  drejtëpërdrejtë/jo  të drejtëpërdrejtë në çështje si:

1-Shlyerja e detyrimeve të prapambetura ndërmjet institucioneve.

MFE e ka përmbushur obligimin e saj, dhe finalizimi i plotë i kriterit arrihet me firmosjen e marrëveshjeve bilaterale ndërmjet ndërmarrjeve të sektorit energjitik. Ndërkohë MFE dhe MIE kanë firmosur Urdhrin e Përbashkët nr. 379, datë 30.09.2021 “Mbi zbatimin e planit të masave të  reduktimit  të  detyrimeve  të  prapambetura  në  sektorin  e  energjisë  elektrike,  me  anë  së  cilit,  kompanive iu është kërkuar të raportojnë periodikisht lidhur me statusin e marrëveshjeve midis  ndërmarrjeve të sektorit elektroenergjitik për detyrimet e prapambetura, raportim periodik mujor  lidhur  me  detyrimet  bilaterale  të  ndërmarrjeve  publike  dhe  hapat  e  mëtejshëm  që  do  të  ndërmerren për shlyerjen e të gjtiha detyrimeve brenda vitit aktual 2021.

2. Propozimi për rishikim të skemës së mbështetjes sociale për rimbursimin e energjisë:

o MFE ka dhënë miratimin paraprak për këtë çështje, dhe asistenca teknike për vlerësimin e skemës aktuale ka filluar punën.

3. Moduli i raportimit në Thesar për detyrimet e prapambetura të përfshijë dhe faturat e papaguara të energjisë elektrike.

-Në  raportin  e  detyrimeve  të  prapambetura  që  gjenerohet  nga  sistemi  Informatik  Financiar  i  Qeverisë (SIFQ), sipas Udhëzimit të ri nr.37 datë 06.10.2020 “Për monitorimin dhe publikimin  periodik të detyrimeve të prapambetura të Qeverisjes së Përgjithshme”, tashmë reflektohen edhe detyrimet  e  prapambetura  për  faturat  e  papaguara  për  energjinë  elektrike,  referuar  të  gjithë institucioneve buxhetore që raportojnë detyrimet në sistem

Detyrimet e shoqërive të Ujësjellës – Kanalizimeve ndaj OSHEE Group Sh.a vazhdojnë të mbeten në një vlerë të konsiderueshme. Totali i këtyre detyrimeve deri në Qershor 2021, sipas Agjencisë Kombëtare  të Ujësjellës Kanalizime dhe Infrastrukturës së Mbetjeve pas rakordimit të të dhenave me OSHEE Group, raporton se detyrimet e akumuluara të ndërmarrjeve të ujësjellës-kanalizimeve rezultojnë të jenë në vlerën 20.37  miliardë  LEK.  Sipas  të  njëtit  raportim  11.05  miliard  LEK  janë  detyrime  të  faturuara  ndaj kompanisë dhe 9.32 miliard LEK janë detyrime për kamatëvonesa.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.