Pr/buxheti i 2021. Ministri i Turizmit dhe Mjedisit, Klosi kërkon më shumë fonde për investime
Turizmi është një ndër sektorët prioritarë të ekonomisë shqiptare dhe që gjatë këtij viti u prek ndjeshëm nga efektet e pandemisë globale. Industria e turizmit priste që në projektbuxhetin e vitit të ardhshëm të jepeshin rrugët e daljes nga kjo situatë e vështirë sidomos nëpërmjet shifrave konkrete, por teksa shfleton relacionin e projektbuxhetit të vitit 2021, sektori i turizmit dhe mjedisit zë një vend të papërfillshëm dhe fjalitë shabllon për Shqipërinë si një destinacion tërheqës turistik, cilësor dhe të qëndrueshëm shkruhen në vetëm 10 rreshta.
Buxheti total për Ministrinë e Turizmit dhe Mjedisit parashikohet në 2.218 mld lekë nga të cilat vetëm 636 mln për zhvillimin e turizmit. Gjatë një dëgjese në Komisionin parlamentar të Veprimtarive Prodhuese, ministri Blendi Klosi ka shprehur ankesa për këtë buxhet, duke e konsideruar “të pamjaftueshëm për të përfunduar investimet”. Sipas ministri Blendi Klosi ky vit tregon që Shqipëria është e papërgatitur për përmbushur pritshmëritë, sa i takon kapaciteteve për pritjen e turistëve numri i të cilëve pritet të arrijë deri në 7 milion në vitin 2021:
“Shqipëria në këtë vit dëshmoi se pothuajse dëshmoi se është e papërgatitur për të pritur një turizëm kaq të madh, sepse vetëm me turizmin e brendshëm, partirotik dhe të shqiptarëve patëm një okupancë të plotë pothuajse nga data 20 korrik deri në 18 shtator. Pra rritja e numrit të turizmeve nuk mund të shkojë pa rritjen e investimeve në këtë fushë.”
Ministri u ndal edhe tek Mjedisi ku nënvizoi disa prioritete si monitorimi i cilësisë së ajrit dhe përmirësimi i politikave për pyjet:
“Investime që duhet të bëjmë në mënyre të menjëhershme për të rritur fondin për monitorimin e mjedisit. Ajo që duhet të bëjmë për politikat e pyjeve, janë një fatkeqësi në fakt në situatën në të cilën ndodhen.”
Ndërhyrja sa i takon tregut të druve të zjarrit ishte një tjetër problematikë e ngritur në Komision, për të cilën Z.Klosi premtoi se do të monitorohen.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.