Pr/ligji për rininë, zv/ministri i arsimit, Kolgega: Mbështetje financiare për talentet dhe aktivitetet e të rinjve
Ministria e Arsimit, Sportit dhe Rinisë është duke hartuar për herë të parë një projektligj për rininë, i cili synon t’i mbështesë të rinjtë në disa aspekte, nga ai edukativ, tek angazhimi publik dhe pjesëmarrja në vendime.
Zëvendësministri i Arsimit, Sportit dhe Rinisë, Shpati Kolgega ka shpjeguar disa nga pikat kryesore të draftit.
“Shqipëria për herë të parë do të ketë një ligj të tillë. Ka disa nevoja që duhen adresuar nëpërmjet këtij ligji. Pika e parë ka të bëjë me krijimin e një databaze për të gjithë organizatat rinore, përfshirë këtu edhe kriteret dhe rregulloret se si duhet të jetë një organizatë rinore. Pika tjetër ka të bëjë me mbështetjen financiare të projekteve rinore. Aktualisht ne nuk kemi mundësi që t’i mbështesim financiarisht për aktivitete, shkëmbimeve apo aktivitete të ndryshme që ata duan të zhvillojnë në qytetet e tyre. Aspektet e tjera kanë të bëjnë me pushtetin lokal, pra adresimi i qendrave rinore lokale, këshillave rinorë lokalë, dhe kjo do të pasohet me ngritjen e Këshillit Rinor Kombëtar”, u shpreh Kolgega.
Përmes këtij ligji, ndryshime do të ketë edhe në pushtetin lokal, ku secila bashki duhet të krijojë një strukturë të posaçme, të caktojë një buxhet dhe një plan për rininë. Megjithatë sipas Kolgegës, më kryesorja është mbështetja e talenteve të reja.
“Një aspekt shumë i rëndësishëm është edhe mbështetja e talenteve të reja nëpërmjet shpërblimeve, bursave, nëpërmjet krijimit të mundësive që të përmirësojnë aftësitë e tyre aty ka kanë talent. Kështu që do të krijojmë një bazë të mirë të rinj të cilët janë të talentuar dhe do të mbështeten përmes këtij ligji, që të zhvillojnë akoma më tej talentin e tyre dhe t’i shërbejnë akoma më mirë komunitetit”, tha zëvendësministri.
Drafti i Ministrisë do të kalojë përmes një faze konsultimi me të rinjtë, e cila për herë të parë do të jetë edhe online, ku çdo i ri të ketë mundësinë të informohet dhe të adresojë sugjerimet e tij.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.