Praktikat e punës – MMSR, Xhafaj: Afati i aplikimit shtyhet deri në 30 gusht
Ministria e Mirëqenies Sociale dhe Rinisë ka shtyrë për herë të dytë afatin e aplikimit, për të rinjtë e moshës 21-26 vjeç, që dëshirojnë të bëhen pjesë e Programit Kombëtar të Praktikave të Punës.
Lajmi për TV SCAN bëhet me dije nga drejtoresha e Përgjithshme e Politikave Sociale, pranë këtij dikasteri Merita Xhafaj, e cila shton se të interesuarit mund të aplikojnë deri në datën 30 gusht.
“Këtë vit në program janë institucionet e administartës publike në nivel qendror, në nivel vendor dhe 10 subjekte private: si banka, kompani celulare apo kompani energjitike. Deri në datën 22 gusht ka patur 2046 aplikime. Duke e krahasuar me aplikimet e viteve të tjerë, numri është pothuajse i njëjtë, por numri i subjekete është shtuar sepse janë edhe kompanitë private. Për këtë arsye ne bëmë edhe një shtyrje afati deri në 30 gusht, me qëllim që të rinjtë të kenë mundësi të aplikojnë. Kjo pasi ka të rinj që nuk kanë patur informacion e për pasojë iu është dhënë edhe një mundësi tjetër për të aplikuar”.
Sipas Xhafajt, përzgjedhja e fituesve do të bëhet Brenda muajit shtator, duke mundësuar dhe fillimin e praktikës.
“Brenda muajit shtator ministritë e bashkitë do të ngrejnë grupet e punës, të cilët do të përzgjedhin nga lista e atyre që kanë aplikuar dhe në bazë të përzgjedhjes, brenda muajit shtator ne do të bëjmë të mundur fillimin e praktikave në të gjithë institucionet”.
Në total MMSR ka shpallur 1343 pozicione për praktikantë në 19 Institucione shtetërore qendrore, 93 Institucione të varësisë, 19 Njësi të Qeverisjes Vendore si dhe 10 Shoqëri Tregtare. Aplikimi mund të bëhet vetëm online, në faqen e dedikuar praktika.sociale.gov.al, ndërsa të drejtën e kanë të gjithë të rinjtë që kanë mbaruar minimalisht ciklin e parë të studimeve bachelor, jo vetëm nga Shqipëria, por edhe nga Diaspora.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.