Preket sërish buxheti 2018 – Dëmi nga Euro, Financat bëjnë ndërhyrjen e dytë

Të papriturat nga lëvizjet e kursit të këmbimit, por jo vetëm, e kanë detyruar Ministrinë e Financave të prekë për të dytën herë buxhetin e vitit 2018.

Ministri Arben Ahmetaj ka thënë pak ditë më parë se goditja që i është shkaktuar arkës së shtetit nga rënia e Euros llogaritet në rreth 7.5 miliardë lekë dhe që viti pritet të mbyllet me një dëm prej afro 10 miliardë lekë të munguara në buxhet.

Burime zyrtare pranë Ministrisë së Financave dhe Ekonomisë konfirmojnë se në muajin Dhjetor parashikohen që të bëhen ndryshime në zërin e të ardhurave dhe shpenzimeve, me prioritet programim të e saktë të parave që do të vijnë nga tatimet e doganat dhe ruajtjen e nivelit të deficitit buxhetor.‌

Financat raportojnë se humbjet më të mëdha janë nga tatimi mbi vlerën e shtuar, zë që është prekur për shkak të rënies së euros, pasi pjesa më e madhe e të ardhurave buxhetore vilen nga akciza e mallrave të importuara, por me mosrealizim rezulton edhe tatim fitimi e akciza.

Në Qershor të këtij viti, Ministria e Financave ndryshoi buxhetin, ku parashikoi paketën e solidaritetit prej 3 miliardë lekësh për shpërblimin e fundvitit të pensionistëve si dhe u dha prioritet projekteve që kishin realizim të shpejtë.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.