Presidenti i Bjellorusisë ndërmerr masën drastike: Ndërpret internetin duke lënë në ‘errësirë’ protestuesit në të gjithë vendin

Ndërsa lufton për mbijetesën e tij politike, Aleksandër Lukashenko ka ndërmarrë një veprim drastik duke ndërprerë internetin në pjesën më të madhe të Bjellorusisë.

Bjellorusët që kërkojnë të protestojnë kundër qeverisë së tij janë ndërprerë kryesisht nga bota e jashtme: interneti në celular është mbytur dhe aplikacionet e mesazheve të njohura janë çaktivizuar, duke i lënë demonstruesit në vështirësi për të gjetur lidhje wifi dhe duke punuar me VPN ose proxies për të marrë internet dhe më pas të ndajnë lajme që mund të gjejnë.

Ndërprerja e internetit, për të cilën Lukashenko shpreson se do të prishë protestat kundër tij për manipulim të masave të votimit në zgjedhjet presidenciale të javës së kaluar, është një shembull i rrallë në Europën moderne të një vendi, që del vullnetarisht offline për të shtypur mospajtimet.

Mungesa e internetit i ka lënë protestuesit në një vakum informacioni. Faqet e njohura të pavarura të lajmeve, duke përfshirë Tut.By dhe Naviny, janë mbajtur kryesisht jashtë linje që nga dita e zgjedhjeve dhe lajmet televizive janë të mbizotëruara nga qeveria.

“Ky bllokim i zgjatur i internetit është i pashembullt,” tha Katsiaryna Shmatina, një analiste politike në Institutin bjellorus për Studime Strategjike, duke përmendur se interneti po bllokohej për më gjatë dhe më agresivisht sesa në protestat e viteve të kaluara. Të martën, kishte zëra të pakonfirmuar se vendi mund të shkurtojë tërësisht trafikun e telefonit dhe internetit.

Me njerëz të paaftë për të arritur njëri-tjetrin, protestat kryesisht janë mbështetur nga blogerët e njohur në kanalet Telegram, disa anonimë dhe të vendosur jashtë vendit, të cilët sugjerojnë pika takimesh për demonstrime dhe shkëmbejnë video protestash dhe lajme, disa prej tyre të paverifikuara, që arrijnë të filtrohen përmes bllokadës.

Më i madhi është Nexta, i cili ka më shumë se 1,151,000 abonentë dhe ka qenë një ‘shtëpi’ kryesore për videot nga protestat e kësaj jave dhe për udhëzime për protestuesit. Të martën në mbrëmje, ajo u tha lexuesve të saj që të takoheshin në ora 7 pasdite në grupe të vogla me më pak se 20 dhe të zinin rrugët. “Paralizoni qytetin!”

Stafi dhe aleatët e Svetlana Tikhanovskaya, kandidatja e opozitës për president e cila ka thënë se nuk do t’i njohë rezultatet për shkak të mashtrimit masiv të votave, tha se mbyllja e kishte bërë praktikisht të pamundur për të koordinuar veprimet. Mbyllja ka prishur bizneset normale, nga sektori i lulëzuar i IT në Bjellorusi e deri tek turizmi.

Ndërprerja e internetit u miratua në nivelin e Beltelecom, ndërmarrjes kombëtare të telekomunikacionit dhe Qendrës Kombëtare të Shkëmbimit të Trafikut të vendit, tha ajo. Operatorët mobilë kanë kërkuar falje për ngadalësimin e shërbimeve, por thanë se ato ndodhën për shkak të “arsyeve jashtë kontrollit tonë”.(theguardian)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.