Presidenti Macron mesazh në drejtim të aleancës: ‘’NATO është duke përjetuar ‘vdekje të trurit’

Presidenti francez Emanuel Macron e ka përshkruar NATO-n si një organizëm truri i së cilës është duke vdekur, duke shpjeguar se ai sheh një shpërfillje përgjegjësie alarmante kundrejt organizatës nga vetë garantorja e saj, SHBA-të.

I intervistuar nga prestigjiozja “The Economist”, ai ka cituar dështimin e SHBA-së për tu konsultuar me NATO-n përpara se të tërhiqte trupat nga Siria Veriore.

Ai gjithashtu hodhi edhe disa hije dyshimi nëse anëtarët e NATO-s ishin ende të angazhuar për mbrojtje kolektive.

“Ajo se çfarë po përjetojmë në këto momente është “vdekja e trurit” të një organizmi si NATO” – zoti Macron u shpreh për revistën britanike.

Ai paralajmëroi anëtarët e BE-së se ata nuk mund të mbështeten më tek SHBA-ja për të mbrojtur aleancën, e cila u themelua në fillimin e Luftës së Ftohtë, për të rritur mbrojtjen e sigurisë së Europës Perëndimore dhe SHBA-ve.

Neni Pesë i Kartës themeluese të NATO-s përcakton se një sulm ndaj një anëtari do të sjellë një përgjigje kolektive nga aleanca.

Por, zoti Macron u duk i pasigurt kur u pyet nëse ky nen ishte akoma i vlefshëm  në ndërhyrjen e Sirisë: “Unë nuk e di më” – tha ai.

Aleanca, citohet të thotë presidenti francez, “funksionon vetëm nëse garantuesi i zgjidhjes së fundit funksionon si i tillë. Unë do të argumentoja se ne duhet të rivlerësojmë realitetin e asaj që është NATO në dritën e angazhimit të Shteteve të Bashkuara”.

Udhëheqësi francez i kërkoi Evropës që të fillojë të mendojë për veten  si një “fuqi gjeopolitike” për të siguruar që do të mbajë “nën kontroll” e fatin e saj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.