Presidenti me 5 raunde, mazhoranca nis procedurën – Rama: Kusht, të jetë normal! Alibeaj: Transparencë e gjithëpërfshirje!
Mazhoranca ka nisur këtë të martë procesin e përzgjedhjes së Presidentit të Republikës, duke dhënë sinjalin e qartë se ka vendosur ta udhëheqë vetë gjithë procedurën. Në mbledhjen e Grupit Parlamentar Socialist, Kryeministri Edi Rama nuk kurseu akuzat për Kreun e shtetit në ikje Ilir Meta, duke vendosur si kusht që Presidenti apo Presidentja e re të jetë e kundërta e këtij të fundit.
Rama i parapriu edhe ndryshimeve ligjore që, sipas tij, do kthejnë në normalitet Institucionin e Kreut të Shtetit, Ligji i ri për Presidentin si dhe një strukturim total i sistemit të dhënieve të titujve dhe të dekoratave, për të cilat Rama tha se Meta e ka shkatërruar totalisht.
Kreu i Grupit Parlamentar të Partisë Socialiste çeli zyrtarisht procesin e votimit, ku deputetët e mazhorancës votuan secili për tre kandidatura. Gjatë fjalës që i parapriu votimit, Balla shpjegoi gjithë procedurën me pesë raunde, duke nënvizuar se ai shpresonte te një zgjidhje e shpejtë që në raundin e parë, një javë pas Konferencës së Kryetarëve. Ai kujtoi se në rast dështimi të tre raundeve të para, të cilët janë me votim të cilësuar, Kuvendi mund ta caktojë Kreun e shtetit me 71 vota.
Nga grupi Parlamentar i Partisë Demokratike ka reaguar Enkelejd Alibeaj. Ai është shprehur i vetëdijshëm që mazhoranca i ka votat për ta zgjedhur vetë Presidentin në raundin e katërt dhe të pestë, shkak për të cilin kërkoi transparencë e gjithëpërfshirje e transparencë.
Ndërkohë që si rrallë më parë, nuk kanë qenë vetëm forcat politike ato që janë përfshirë në ethet e zgjedhjes së Presidentit të Republikës. Numërohen tashmë disa kandidatura të vetëshpallura publikisht, siç qe ajo e Sazan Gurit apo e Elena Kocaqi.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.