Presidenti Meta: “Ekzekutimi i Vendimeve të Gjyqësorit, garanci për një ekonomi efikase”
Presidenti i Republikës, Ilir Meta mori pjesë dhe përshëndeti Konferencën ndërkombëtare me temë “Ekzekutimi i Vendimeve të Gjyqësorit – Garanci për një ekonomi efikase”, të organizuar në Tiranë nga Dhoma Kombëtare Franceze e Përmbarueseve, në të cilën ishin të pranishëm gjithashtu përfaqësues të Kuvendit, përfaqësues të qeverisë, juristë dhe përmbarues vendas e të huaj.
“Zhvillimi ekonomik i një vendi është i lidhur ngushtë me cilësinë e sistemit të drejtësisë së tij sepse, nëse ky sistem garanton mbrojtjen dhe ekzekutimin e të drejtave, atëherë kjo klimë pozitive do të nxitë iniciativa dhe sipërmarrës të rinj, për t’u bërë pjesë e kësaj klime.
Një rol të rëndësishëm në krijimin e një klime pozitive për biznesin dhe zhvillimin ekonomik, ka pikërisht shërbimi përmbarimor, i cili është hallka fundore e sistemit gjyqësor, që vendos në zbatim vendimin e gjykatës dhe bën të prekshme realisht drejtësinë e dhënë.
Ekzekutimi i një vendimi gjyqësor është një proces po aq i rëndësishëm sa vetë momenti i dhënies së vendimit, pasi është momenti kur një e drejtë e fituar materializohet, dhe ajo që gjykata ka vendosur, bëhet e prekshme për palët.
Ekzekutimi në kohën dhe me cilësinë e duhur i një vendimi gjyqësor është tregues kyç se drejtësia funksionon, dhe njëkohësisht ndihmon për të garantuar një zhvillim të qëndrueshëm ekonomik” tha Meta.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.