Prezantohet “fiskalizimi” – Fatura elektronike dhe raportim shitjesh në kohë reale
Ministria e Financave do të prezantojë zyrtarisht të mërkurën projektligjin e fiskalizimit, që synon të sjellë një mënyrë të re të raportimit të shitjeve nga bizneset. Me ligjin e ri, që pritet të hyjë plotësisht në fuqi në vitin 2021, bizneset do të lëshojnë fatura elektronike, si në marrëdhëniet mes tyre, ashtu edhe në shitjet për konsumatorët.
Për shitjet cash, këto fatura do të zëvendësojnë kuponin tatimor. Të gjitha shitjet do të raportohen në kohë reale në sistemin e administratës tatimore dhe jo më në fund të ditës, siç ndodh sot. Platforma elektronike e faturave do të mundësojë kryqëzimin e informacionit dhe ndjekjen e rrugës së produktit që nga prodhuesi apo importuesi e deri te konsumatori final. Sipas Ministrisë së Financave, kjo do ta bëjë më të lehtë gjurmimin dhe zbulimin e evazionit fiskal dhe do të pakësojë kontrollet fizike te bizneset.
Sistemi i ri nuk do të mbështetet më domosdoshmërish te kasa fiskale, por te një program ose aplikacion që mund të përdoret edhe përmes kompjuterëve të zakonshëm apo aparateve celularë. Vetë kasa nuk do të jetë më e detyrueshme dhe biznesi mund të zgjedhë t’i printojë faturat duke lidhur një printer me kompjuterin apo celularin. Sipas Ministrisë së Financave, aplikacioni do të ofrohet lirshëm nga çdo kompani e specializuar që do të ketë dëshirë ta bëjë këtë, duke u certifikuar më parë nga Ministria e Financave dhe Agjencia Kombëtare e Shoqërisë së Informacionit. Parashikohet që kosto vjetore e shërbimit për këtë aplikacion të jetë e ngjashme me kosto aktuale të mirëmbajtjes së kasës fiskale.
Për të lëshuar faturat elektronike, të gjitha bizneset do të pajisen detyrimisht në nënshkrimin elektronik. Sipas Ministrisë së Financave, pajisja me nënshkrimin elektronik ligjërisht është detyrim edhe sot, me qëllim dorëzimin e deklarimit elektronik nga biznesi. Administrata tatimore ka toleruar në këtë pikë dhe i pranon deklarimet edhe pa të; por, nga momenti që faturat do të jenë elektronike, detyrimi për nënshkrim elektronik duhet të zbatohet. Pajisja me nënshkrim elektronik bëhet nga Agjencia Kombëtare e Shoqërisë së Informacionit dhe, aktualisht, kushton 4 mijë lekë në vit.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.