Prishja e kontratave të HEC-eve/Minimalisht 1 mln euro për kontratë, Shushku: Janë investuar 500 mln euro
Në rast të prishjes së kontratave për ndërtimin e hidrocentraleve, shteti shqiptar do t’i paguajë koncesionarit minimalisht 1 milion euro, që shkon vlera e investimit për një HEC 2 MW, pa përllogaritur këtu dhe fitimin e munguar përgjatë 35 viteve të kohëzgjatjes së kontratës”.
Pas, nisjes së skanimit nga Ministria e Infrastrukturës dhe Energjisë, Anita Shushku, drejtore bordi e Shoqatës Shqiptare të Energjive të Rinovueshme thotë për SCAN se këto janë detyrime që janë përcaktuar në kontratat e nënshkruara, ndërkohë që vlera e investimit në sektor aktualisht përllogaritet në mbi 500 milion euro.
Në lidhje me HEC-et jo operative Shushku thotë se përgjegjësi kryesor për këtë situatë është autoriteti kontraktues sepse nuk ka arritur të plotësojë kushtin e gëzimit të qetë të truallit.
Pak ditë më parë, Ministrja e Infrastrukturës dhe Energjisë njoftoi nisjen e skanimit të gjitha kontratave koncesionare për ndërtimin e hidrocentraleve, duke shtuar se nga 440 HEC-e, vetëm 96 prej tyre janë operative, ndaj procesi është i domosdoshëm për gjykimin e ecurisë së kontratave.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.