Pritet rimëkëmbja e euros – Projektohet 1.22$ në 1 vit, pasi të “shterojë” rritja e dollarit
Trazirat ekonomike dhe politike në Eurozonë do të shtojnë presionet te monedha e përbashkët në muajt e ardhshëm, por analistët e këmbimit valutor në një sondazh të Reuters, argumentojnë se euro pritet të rritet vitin e ardhshëm, ndërkohë që fuqizimi i dollarit zbehet.
Sipas analistëve, parashikimi se kur dollari do të bjerë përbën një sfidë, valutë që ka marrë nxitje nga perfromanca e fortë ekonomike e SHBA dhe tkurrja monetare nga Rezerva Federale.
Euro pritet të rritet me 2% në 1.16 dollarë në 3 muajt e ardhshëm, por 80% e analistëve argumentojnë se ekzistojnë shumë rreziqe ndaj këtij parashikimi. Perspektiva e dobët për euron po nxitet nga rritja e ngadaltë ekonomike dhe shqetësimet mbi buxhetin e Italisë.
Perspektiva 12 mujore për euron ka mbetur e qëndrueshme në 1.20 kundër dollarit, sipas sondazhit të Reuters, prej pritshmërive se Banka Qendrore Europiane do të përfundojë programin e stimujve në Dhjetor dhe rrisë normat e interesit në vitin 2019.
Pasi euro ra në nivelin më të ulët në 13 muaj gjatë Gushtit në 1.1297 dollarë, analistët u pyetën në sondazh se sa poshtë do të bie euro në tremujorin e katërt. Përgjigja mesatare në sondazh ishte 1.14 dollarë, por valuta ra poshtë atij niveli muajin e kaluar, në 1.1299.
Megjithatë, valuta e përbashkët, që ka rënë me rreth 6% për 2018-ën, parashikohet të rimëkëmbet dhe të fitojë rreth 8% në 1.22 dollarë në një periudhë 1 vjeçare. Projeksionet për euron në të ardhmen po nxiten gjithashtu nga pritshmëritë e rënies së dollarit.
Ndërkohë që faktorët kryesore që kanë nxitur dollarin pritet të zbehen, valutat kryesore projektohet të rriten në 12 muajt e ardhshëm, sipas sondazhit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.