Pritet rritje e aktivitetit kreditues – BSH: Bankat parashikojnë rigjallërim të kërkesës në T4, për individët dhe bizneset
Të dhënat më të fundit të Bankës së Shqipërisë sa i përket aktivitetit kreditues në tremujorin e tretë të vitit tregojnë se, kërkesa e individëve për kredi u perceptua me rënie edhe në tremujorin e tretë të vitit, si për kredinë konsumatore, ashtu edhe për financimin e blerjes së banesave. Në tremujorin e fundit ndërkohë, pritet një gjallërim i kërkesës për kredi në të dyja kategoritë, për financimin e konsumit dhe blerjen e banesave, thotë banka e Shqipërisë.
“Sipas gjykimit të bankave, nevojat më të ulëta në financimin e konsumit dhe të blerjes së banesave, zhvillimet aktuale dhe të pritura në tregun e banesave, si edhe shtimi i kredive në bankat e tjera sollën rënien e kërkesës për kredi në tremujorin e tretë të vitit. Po ashtu, bankat kanë vlerësuar se në tremujorin e tretë të vitit rënia e të ardhurave dhe pasiguria financiare për të ardhmen, të shkaktuara nga zgjatja e periudhës së pandemisë, ishte një prej faktorëve kryesorë që solli rënien e kërkesës për kredi. Edhe sa i përket bizneseve, kërkesa për kredi raportohet disi më e ulët në tremujorin e tretë të vitit 2020.
Kërkesa më e ulët për kredi u shfaq vetëm në segmentin e biznesit të madh dhe në kreditë dhënë për financimin e investimeve. Nga ana tjetër, në këtë tremujor u vërejt një kërkesë e shtuar për kredi nga bizneset e vogla e të mesme, si edhe për mbulimin e nevojave për likuiditet. Në tremujorin e fundit të vitit bankat presin zgjerim të kërkesës për kredi si nga biznesi i vogël e i mesëm, ashtu edhe nga ai i madh. Në terma të qëllimit të përdorimit, rritja e pritur e kërkesës për kredi është më e dukshme në kreditë për likuiditete, ndërkohë në kreditë për investime pritet një kërkesë pothuajse e pandryshuar nga një tremujor më parë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.