Pritet rritje e çmimit të kafesë. Kompanitë raportojnë rritje të kostos së transportit, prej pandemisë
Procesuesit e kafesë në Shtetet e Bashkuara, që është konsumatori më i madh i pijes, po raportojnë rritje të madhe të kostove tek operacionet e tyre, kryesisht të lidhura me transportin, dhe presin të rrisin së shpejti çmimet retail. Procesuesit e vegjël dhe të mesëm, janë goditur më rëndë, sipas ekzekutivëve. Megjithatë, edhe kompani të mëdha si “Peet’s Coffe” dhe “JM Smucker” thonë se po përballen me kosto të mëdha.
Sektorë të tjerë të biznesit në SHBA përballen gjithashtu me inflacion të transportit. “S&P Global Platts”, ofruesi i inteligjencës për tregun, raportoi se transporti mund të ketë shtuar rreth 10 mld dollarë tek kostot korporative në itineraret drejt SHBA, në tremujorin e katërt 2020. Javën e kaluar, problemet në transport çuan çmimet e kafesë në nivelin më të lartë në 1 vit. Kompanitë e procesimit bëjnë të ditur se po nënshkruhen kontrata për dërgesat në Verë dhe Vjeshtë dhe çmimet janë rritur me rreth 15%.
Sipas tyre, po diskutohet nëse do pranohen kostot, apo do rriten çmimet. Ekzekutivët e kafesë thonë se kërkesa më e madhe për shërbimet e transportit, për shkak të blerjeve në rrjet, si dhe procedurat për sigurinë gjatë pandemisë, kanë rritur kostot në SHBA. Kompanitë thanë gjithashtu se kostot e transportit në oqeane janë rritur gjithashtu si pasojë e problemeve me kontejnerët , të shkaktuara nga pandemia.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.