Pritja e azilkërkuesve, Deutsche Welle: Shqipëria do të shërbente si recepsion, refugjatët do të shpërndahen në vendet e BE
Media gjermane Deutsche Welle ka publikuar mëngjesin e sotëm informacione lidhur me mundësinë që Shqipëria të shërbejë si vend pritës i azilkërkuesve që i drejtohen Bashkimit Europian. Sipas burimeve të DW nga zëdhënësi i qeverisë austriake Peter Launsky-Tieffenthal, bisedimet për krijimin e qendrave të përkohshme pritëse po zhvillohen me Shqipërinë dhe shtete të tjera.
Nga ana tjetër, Endri Fuga, raporton media gjermane, mohon faktin se qeveria shqiptare po merr pjesë në negociata të tilla.
Zgjedhja e Shqipërisë si vend “recepsioni” për të hyrë më pas në BE, është e favorshme për Europën për shkak se vendi ynë ndodhet përgjatë rrugës së migrimit të Ballkanit dhe rrugës përgjatë Mesdheut, rrugët më të përdorura nga individët që duan të kapërcejnë kufijtë drejt Bashkimit Europan.
Porti i Durrësit gjithashtu ka kapacitetet për të regjistruar dhe strehuar një numër të madh individësh që tentojnë të kapërcejnë detin. Këta individë do të shoqërohen në Shqipëri me anije e Frontex, agjencisë kufitare të BE, dhe në vendin tonë do të prisnin deri në vendimin për kërkesën e tyre të azilit. Ata që nuk i përmbushin kushtet do të riatdhesohen, ndërsa ata që marrin azilin do të shpërndahen më pas në vendet e BE.
Marrëveshja për të vendosur një qendër të tillë në Shqipëri, sipas DW, do t’i shërbente edhe kancelares Merkel në debatin e saj me partinë simotër të CDU në Bavari, CSU. Nga marrëveshja do të përfitonte edhe Shqipëria, pasi me hapjen e zyrave të pritjes mund të bindte për hapjen e negociatave për anëtarësim edhe forcat më konservatore të bllokut.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.