Privatizimet, prioriteti i Greqisë – Pas programit të shpëtimit do të jetë ky objektivi kryesor
Tashmë që Greqia ka dalë nga programi i shpëtimit, objektivi numër një i qeverisë dhe i vendit duhet të jetë ai i axhendës së privatizimeve. Ky është prioriteti kryesor i Greqisë në epokën pas programit të shpëtimit. Për çudi, Syriza, partia e majtë në pushtet, dikur pionere e shtetëzimeve, tashmë kërkon edhe ajo që të përshpejtojë procesin e shitjes së aseteve shtetërore te privati. Por këta të fundit janë mjaft skeptik, pasi Greqia nuk është treguar asnjëherë korrekte në këtë proces, që prej vitit 2011.
Vendi nuk i`u afrua dot kurrë objektivit për të privatizuar asete në vlerën e 50 miliardë eurove. Gjatë viteve 2011-2017 janë kryer vetëm 38 shitje për një vlerë prej vetëm 4.7 miliardë euro, thonë të dhënat zyrtare të Ministrisë së Financave. Një pjesë e madhe e projekteve ndërkohë kanë mbetur vetëm në letër dhe vlerësohen të një vështirësie të lartë. Gjithsesi, ky vit vlerësohet pozitiv pasi projektohet që të mblidhen 2.7 miliardë euro nga asetete shtetërore që do të shiten te privati. Nga ana tjetër, këtë vit pritet progres nga disa prej projekteve madhore.
Një muaj më parë qeveria greke ra dakord të shesë 66% të kuotave të saj të operatorit të shpërndarjes së gazit, për 535 milionë euro. Për 31% të kuotave të kompanisë helene të naftës ndërkohë janë arkëtuar 252 milionë euro. Po gjatë këtij viti janë shitur edhe 67% të kuotave të portit të Selanikut, i dyti më i madh në vend, për 231 milionë euro. Për 284 milionë euro ndërkohë, Deutsche Telecom ka blerë 5% të kuotave të operatorit më të madh të telefonisë në vend.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.