Privatizohet të gjitha klubet sportive dhe pasuritë e paluajtshme që kanë! Nisma në Kuvend: Brenda 3 muajsh shndërrohen në shoqëri tregtare
Në Kuvend është depozituar një projektligj që ka si qëllim përmirësimin e infrastrukturës sportive në vend. Me anë të këtij projektligji synohet të përcaktohet forma, procedura dhe formula e privatizimit të klubeve sportive, në pronësi të organeve të qeverisjes qendrore dhe të njësive të vetëqeverisjes vendore.
Referuar projektligjit, të gjitha klubet sportive në pronësi të organeve të qeverisjes qendrore dhe të njësive të vetëqeverisjes vendore, të cilat nuk janë të organizuara ende në formën e një shoqërie tregtare, brenda 3 muajve nga hyrja në fuqi e këtij ligji, mund të shndërrohen në shoqëri tregtare.
“Organi shtetëror, që ka në pronësi klubin sportiv dhe/ose që ka në pronësi pasuritë e paluajtshme dhe asete të tjera në funksion të klubit sportiv, i vendos si kontribut në natyrë në kapitalin themeltar të shoqërisë tregtare që do të krijohet.
Vendimi për transformimin e klubit sportiv në shoqëri tregtare merret nga ministria përgjegjëse për ekonominë, nëse organi që ushtron të drejtat e pronarit të klubit sportiv është një institucion shtetëror qendror, dhe nga këshilli bashkiak, që ushtron të drejtat e pronarit të klubit sportiv, sipas ligjit nr.139/2015, “Për vetëqeverisjen vendore”, të ndryshuar, nëse klubi sportiv është në pronësi të njësisë së vetëqeverisjes vendore.
Privatizimi i klubeve sportive realizohet nëpërmjet transferimit tek investitorët e interesuar të aksioneve të zotëruara në shoqëritë tregtare nga organet e pushtetit qendror e njësitë e vetëqeverisjes vendore në këto klube sportive.
Projektligji përcakton procedurat e privatizimit, sipas së cilës autoriteti shitës është përgjegjës për realizimin e procedurave të privatizimit të aksioneve të shoqërive tregtare administruese të klubeve sportive. Procedurat e privatizimit bëhen në përputhje me dispozitat e ligjit për ankandin publik dhe të akteve nënligjore të nxjerra në zbatim të tij” përcaktohet në projektligjin që sjell SCAN.
Projektligji përcakton se kriteret e përzgjedhjes së investitorëve të interesuar dhe kriteret e vlerësimit të ofertave për privatizimin e klubeve sportive përcaktohen me vendim të Këshillit të Ministrave.
Këshilli i Ministrave, në përcaktimin e këtyre kritereve, mbështetet në këto elemente:
– Deri në 70% për qind të pikëve të kritereve të vlerësimit për shpalljen fitues i caktohen:
- a) projektit të investimit të paraqitur nga investitorë të interesuar për zhvillimin e klubit sportiv ose kontributit të drejtpërdrejtë në klubin sportiv nëpërmjet financimit të parave;
- b) eksperiencës së mëparshme në financime, përfshirje apo administrim të klubeve sportive;
– Deri në 30% të pikëve të kritereve të vlerësimit për shpalljen fitues i caktohen çmimit të ofruar për blerjen e aksionit/kuotës.
Projektligji përcakton formulën e privatizimit të aksioneve/kuotave të klubeve sportive, e cila është, si më poshtë:
– Nga 51% deri në 100% të aksioneve/kuotave të kapitalit u ofrohen investitorëve të interesuar, të cilët mund të jenë shoqëri apo bashkim shoqërish, që zotërojnë garancitë e nevojshme financiare për zbatimin e projektit të investimit të paraqitur. Çmimi i privatizimit paguhet për llogari të shitësit.
Këshilli i Ministrave përcakton rregullat e detajuara për formulën e privatizimit të aksioneve/kuotave shoqërive tregtare, administruese të klubeve sportive.
Projektligji përcakton që destinacioni i pasurive të paluajtshme dhe i aseteve të tjera në funksion të klubit sportiv, në kuptim të ligjit nr.79/2017, “Për sportin”, të cilat u kalojnë shoqërive tregtare administruese të klubeve sportive, nuk mund të ndryshohet, pavarësisht privatizimit, për të paktën 99 vjet.
Ky projektligj përcakton se kontrata për shitjen e aksioneve/kuotave detyrimisht duhet të përmbajë:
– detyrimin që investitori të mos ndryshojë destinacionin e pasurive të paluajtshme dhe aseteve të tjera në funksion të klubit sportiv;
– detyrimin e palëve për të regjistruar në regjistrat shtetërorë të pasurive të paluajtshme këtë kufizim të së drejtës së pronësisë;
– parashikimin se, në rast tjetërsimi të pasurive të paluajtshme dhe aseteve të tjera, pronarët vijues mbartin të njëjtin kufizim të së drejtës së pronësisë.
Në projektligj parashikohet që në rastin kur investitori pronar do të rindërtojë nga fillimi një objekt sportiv në pronësi të klubit sportiv të privatizuar, mbi objektin e ri sportiv të ndërtuar do të aplikohen të njëjtat ndalesa për mosndryshimin e destinacionit, sipas parashikimeve të këtij projektligji.
Projektligji përcakton që destinacioni i pasurive të paluajtshme dhe i aseteve të tjera në funksion të klubeve sportive nuk mund të ndryshohen as në rastet e shpalljes së falimentit të shoqërive tregtare administruese të klubeve sportive.
Në këtë projektligj parashikohet që kontrata për shitjen e aksioneve të shoqërive tregtare administruese të klubeve sportive të nënshkruhen nga ministri përgjegjës për ekonominë, pasi të miratohet me vendim nga Këshilli I Ministrave.
Projektligji parashikon që kontrata për shitjen e aksioneve/kuotave të shoqërive tregtare administruese të klubeve sportive, të cilat nënshkruhen nga kryetarët e njësive të vetëqeverisjes vendore, miratohen me vendim nga këshilli bashkiak I njësisë përkatëse.
Efekti i pritshëm i këtij projektligji është përmirësimi i situatës në fushën e sportit nëpërmjet lehtësirave të parashikuara në këtë projektligj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.