Problematikat e biznesit – Doganat premtojnë lehtësi proceduriale

Heqja e çmimeve të referencës, eliminimi i vonesave në tranzitin e mallrave dhe lehtësim të procedurave aktuale janë problematikat kryesore që ngre komuniteti i biznesit.

Këto shqetësime u ngritën gjatë një forumi biznesi të organizuar nga Dhoma Amerikane e Tregtisë me Drejtorinë e Përgjithshme të Doganave. Alketa Uruci, drejtore për taksat dhe ligjet në Dhomën Amerikane, i përmblodhi këto shqetësime, të cilat ia paraqiten si paketë drejtores së Doganave, Belinda Ikonomi, e cila më pas iu përgjigj këtyre shqetësimeve.

Por media u lejuan vetëm në pjesën e parë të këtij forumi, i cili vazhdoi më pas me dyer të mbyllura. Burime të TV SCAN, pranë Dhomës Amerikane bënë të ditur se një sërë problematikash janë diskutuar gjatë këtij forumi.

Kështu një problem i ngritur ka qenë afati i shkurtër i apelimit kur biznesi nuk është dakord me vlerësimin e deklaratës doganore, procedure e cila është brenda 5 ditëve pa efekt financiar, ndërsa brenda 30 ditëve më efekt financiar.

Një problematikë që ka ardhur nga kompani që importojnë çimento ishte ajo e mos azhornimit të çmimeve të referencës, apo ajo e tarifave të integruara.

Gjithashtu prania në treg e mallrave të markave të njohura, sidomos ato kozmetike, ndërkohë që ka kompani të cilat kanë ekskluzivitetin e importimit, ishte një shqetësim i ngritur, apo prania e madhe në treg e duhanit që nuk paguan akcizë, që sipas tyre po rrit konkurrencën e pandershme.

Një tjetër kërkesë e këtij komuniteti ka qenë thjeshtimi i procedurave doganore për eksportet me regjim të përkohshëm, sidomos me peshat si dhe mospërputhja e kodeve doganore e cila sipas sipërmarrësve i penalizon në klasifikimin në kanalet doganore jeshile apo blu.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.