Probleme për prodhuesit e makinave – Bien shitjet vjetore në Kinë për të parën herë në 2 dekada

Shitjet e makinave në Kinë vazhduan rënien në muajin Janar, pasi e mbyllën në rënie vitin 2018 për të parën herë në 2 dekada.

Kjo ka shtuar presione te prodhuesit e makinave pasi Kina përbën tregun më të madh në botë dhe ndërkohë që kërkesa në SHBA dhe Europë ka rënë. Shitjet e makinave për pasagjerë ranë me 17.7%  në Janar me bazë vjetore, që është rënia më e madhe që kur nisi ky trend në mes të vitit të kaluar. Rënia e vazhdueshme i lë prodhuesit e makinave me pak alternativa.

Tregjet në Europë dhe Amerikën e Veriut janë tkurrur prej rritjes së taksive online dhe shërbimeve të ndarjes së makinave. Japonia ndodhet në tkurrje gjithashtu dhe tregjet e tjera më të vogla nuk kanë fuqi të kompensojnë rënien në këto rajone. Ekonomia e dytë më e madhe në botë është ngadalësuar dhe negociatat për tregtinë me Shtetet e Bashkuara nuk kanë përfunduar ende.

Rënia në Janar, që preku një total prej 2.02 milionë makina të shitura, erdhi pas një rënieje me 15.8% në Dhjetor, sipas  të dhënave të Shoqatës Kineze të Prodhuesve të Makinave. Për të gjithë vitin 2018, shitjet e makinave ranë me 4.1%, që është rënia e parë që prej fillimit të viteve 90. Sipas analistëve, gjysma e parë e vitit 2019 do të jetë e vështirë gjithashtu, ndërkohë që ulja e taksës së blerjes në efekt që prej vitit 2017, ka bërë që konsumatorët të blinin makina më herët se ç‘planifikonin. Volkswagen, prodhuesi më i madh i huaj në Kinë, ka parashikuar se tregu kinez do të tkurret në gjysmën e parë të vitit.

Daimler, prodhuesi i Mercedes dhe BMW, kanë ulur projeksionet për fitimet këtë vit prej presioneve nga lufta tregtare SHBA-Kinë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.