Problemet me fluturimet ajrore – Ndërhyrjet e Aviacionit: Të ulin numrin e udhëtimeve, ose të shtojnë avionët

Pas numrit të lartë të vonesave dhe anulimeve të fluturimeve përgjatë këtij vitit nga aeroporti Ndërkombëtar “Nënë Tereza”, Autoriteti i Aviacionit Civil pritet të ndërhyjë, duke ndikuar në planin e fluturimeve të kompanive ajrore që operojnë në vendin tonë.

Gjatë diskutimeve të “Kodit të ri Ajror” në Komisionin e Sigurisë Kombëtare, kreu i këtij dikasteri, Krislen Këri tha se për sezonin e dimrit këtyre kompanive do u kërkohet të ulin numrin e fluturimeve ose të shtojnë avionët e dedikuar për tregun shqiptar.

Ndërkaq, në lidhje me çmimet e larta të biletave ajrore, dokumenti i ri që po diskutohet në kuvend duket se nuk jep një zgjidhje, duke lejuar Aviacionin Civil të ndërhyjë vetëm në rastet kur kompanitë aplikojnë çmimet të ulta.

Në këto kushte, shpresat që shqiptarët të paguajnë më lirë udhëtimin me avion mbeten te startegjia që po ndjek qeveria, që lidhet kryesisht me heqjen ‘de facto’ të monopolit të aeroportit ‘Nënë Tereza’, duke vënë në funksion atë të Kukësit apo ndërtuar aeroportin e Vlorës.

Një tjetër mundësi është edhe rishikimi ekonomik që pritet t’i bëhet kontrëts koncesionare për vendosjen e balancës ekonomike, nëse kanë lindur të tilla që prej hyrjes së saj në fuqi.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.