Problemet me pronat – Rama: Nga shtatori një institucion i vetëm, ngremë dhe një strukturë apeli
Të gjitha institucionet që merren me pronat sikurse janë hipotekat apo ALUIZNI do të bashkohen në një të vetëm, duke lehtësuar procedurat për qytetarët”. Gjatë një takimi me koordinatorët e bashkëqeverisjes, kryeministri Edi Rama tha se gjithë reforma në sektor do të lançohet në muajin shtator.
“Në shtator jemi gati të lançojmë reformën për të cilën është punuar qysh në verën e shkuar, të bashkimit të institucioneve të pronës, për të pasur një agjenci kombëtare të pronës, në mënyrë që të mos shkosh te ALUIZNI, ta marrësh dhe pastaj të shkosh te hipoteka, s’ta jep. Për të mos shkuar e ardhur mes institucioneve, por për të pasur një institucion, një drejtim dhe një rrugë të përbashkët”, u shpreh Rama.
Paralelisht do të krijohet edhe një strukturë apeli, çka sipas kryeministrit do të evitojë proceset gjyqësore.
“Do të krijojë brenda këtij institucioni të ri një strukturë apeli, në mënyrë që qytetarët të mos jenë të detyruar të shkojnë menjëherë në gjykatë, por të kenë mundësi të apelojnë brenda për brenda institucionit, në një strukturë që është autonome, një lloj avokati i qytetarit në institucion”, deklaroi kryeministri.
Teksa u prezantuan disa raste të suksesshme, Rama ftoi qytetarët që t’i drejtohen platformës së bashkëqeverisjes për të denoncuar problemet e tyre. Gjithashtu, kryeministri tha se tashmë është gati edhe shkolla e drejtorëve, e cila do të formojë drejtues të specializuar për institucionet e arsimit.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.