Prodhimi i minierave të arit – Bie në nivelin më të ulët që prej krizës financiare, nxit çmimet
Oferta e arit ka rënë në mënyrë kritike këtë vit, duke nxitur çmimin e metalit te çmuar në një kohë të tensioneve gjeopolitike.
Sipas bankës australiane ANZ, rritja e prodhimit të arit në miniera gjendet në nivelin më të ulët që prej krizës financiare.
Prodhimi i arit ka rënë me 2% në 5 muajt e parë të 2017-ës nga e njejta periudhë një vit më parë. Vetëm për muajin Maj, outputi ra me 3.1% me bazë vjetore.
Sipas bankës, ndryshimi i politikave të qeverive në vendet prodhuesi po krijojnë paqartësi dhe godasin ofertën.
Në Indonezi, qeveria paraqiti rregulla të reja për minierat dhe eksportet, gjë që nxiti kompaninë Freeport që të mbyllë minierën Grasberg, miniera e arit më e madhe në botë që prodhonte rreth 2% të sasisë totale në botë.
Nga ana tjetër, kërkesa e konsumatorëve po përmirësohet. Sipas Këshillit Botëror të Arit (WGC), kërkesa totale për shufra dhe monedha u rrit me 13% në tremujorin e dytë 2017, kryesisht prej rritjes me 56% të kërkesës në Kinë.
Çmimet e metalit të çmuar janë rritur së fundmi edhe prej rreziqeve gjeopolitike.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.