Prodhimi industrial në Gjermani – Rritet me normën më të lartë në 6 vite, ekonomia pritet e fortë në T3
Prodhimi industrial në Gjermani ka treguar rritjen më të madhe mujore në më shumë se 6 vite për Gushtin. Sipas të dhënave, ekonomia po ecën në kapacitet të plotë dhe pritet të publikojë një normë të qëndrueshme të rritjes për tremujorin e tretë, edhe pse dyshimet mbi përbërjen e qeverisë së re shtojnë pasiguritë.
Prodhimi i kombinuar në manifakturë, ndërtim dhe energji u rrit me 2.6% për muajin, pas një rënieje me 0.1% në Korrik, tregojnë të dhënat e Ministrisë së Ekonomisë. Ky ishte treguesi më i fortë mujor që prej Korrikut 2011 dhe theu fare lehtë projeksionet më optimiste të analistëve për një rritje me 0.7%. Analistët e Commerzbank, huadhënësi i dytë më i madh në Gjermani, thanë se të dhënat janë të forta, duke theksuar disa faktorë të veçantë si rinisja e aktivitetit të fabrikave pas verës.
Sipas analistëve, ekonomia për tremujorin e tretë pritet në rritje të fortë, me një vlerësim prej 0.6% me bazë tremujore. Prodhimi në manifakturë u rrit me 3.2%, që është norma më e lartë që prej Marsit 2010, prej rritjes së mallrave të ndërmjetme, kapitale dhe të konsumit për muajin. Prodhimi në Energji u rrit gjithashtu ndërsa aktiviteti në sektorin e ndërtimit u tkurr lehtë. Prodhuesit e makinave ishin nxitësit kryesor në normën totale (2.6%), raportoi ministrja.
Ekonomia gjermane u rrit me 0.7% në tremujorin e parë të vitit, ndjekur me një normë prej 0.6% në të dytin, nxitur nga shpenzimet e ekonomive familjare dhe shtetërore si dhe investimeve më të mëdha në ndërtesa dhe makineri. Institucionet kryesore kanë rritur projeksionet për ekonominë, në një normë prej 1.9% në 2017-n dhe 2% në vitin e ardhshëm. Qeveria gjermane do të prezantojë projeksionet e përditësuara për rritjen e Produktit të Brendshëm Bruto, punësimin dhe inflacionin më vonë gjatë javës.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.