Prodhimi industrial në Japoni – Rritet ndjeshëm prej makinave, mbështet ekonominë
Prodhimi i fabrikave në Japoni është rimëkëmbur në muajin Qershor, pas tkurrjes në Maj, prej rritjes së prodhimit të makinave dhe kimikateve industriale, duke treguar se zgjerimi ekonomisë mund të vazhdojë në pjesën tjetër të vitit.
Prodhimi industrial u rrit me 1.6% në Qershor nga muaji i kaluar, krahasuar me një rënie prej 3.6% të regjistruar në Maj. Prodhuesit deklaruan se presin një rritje të qëndrueshme të aktivitetit në muajt që vijnë, duke treguar se kërkesa e firmave jashtë vendit dhe rritja e shpenzimeve konsumatore mund të mbështesin rimëkëmbjen e ekonomisë së tretë më të madhe në botë.
Prodhimi në sektorin e transportit u rrit me 4.2% në Qershor, nga 13% rënie që u regjistrua muajin e kaluar, prej prodhimit të makinave për pasagjerë dhe motorëve për automjetet. Prodhimi i kimikateve u rrit me 3.4% në Qershor, në rimëkëmbje nga rënia me 2.2% në Maj. Inventarët në të gjithë industritë ranë më 2.2%, rënia më e madhe në 6 vite, për shkak të reduktimit të inventarëve në makina, çelik dhe pajisje elektronike.
Prodhimi industrial u rrit me 1.9% në tremujorin e dytë, duke kaluar bindshëm rritjen me 0.2% në tremujorin e parë. Duke marrë parasysh korrelacionin e fortë pozitiv mes prodhimit industrial dhe Produktit të Brendshëm Bruto në Japoni, rritja ekonomike mund të jetë përshpejtuar në tremujorin e dytë.
Shpenzimet e ekonomive familjare, që u rritën me normën më të shpejtë në dy vite, si dhe tregu i fortë i punës, kanë rritur optimizmin për vrullin e ekonomisë japoneze.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.