Prodhimtaria e energjisë së konsumuar – Shqipëria më e mira në rajon. Fitoi 4.5 euro për 11.6 kWh të shpenzuara

Energjia elektrike është një “mjet” që njerëzit përdorin për t’u ndriçuar, ngrohur, gatuar, por edhe për të prodhuar dhe për të gjeneruar të ardhura.

Duke bërë një raport të energjisë së konsumuar në të gjithë vendin dhe produktit të brendshëm bruto të atij vendi, mund të nxirret një indikator i prodhimtarisë së energjisë së konsumuar. Kjo do të thotë se një shtet që arrin të prodhojë më tepër duke shfrytëzuar më pak energji elektrike, është më eficent në përdorimin e saj.

Kështu, sipas të dhënave të Eurostat, zyrës europiane të statistikave, Shqipëria në vitin 2015 pati një prodhim prej 4.5 eurosh për KGOE, ose kilogram në ekuivalentin në karburant, njësi e barabartë me 11.63 kWh.

Shqipëria në fakt është vendi që performon më mirë në rajon , sa i takon këtij treguesi. Vendi i renditur menjëherë pas nesh, Mali i Zi, prodhon vetëm 3.3 euro për KGOE, ndërsa Maqedonia vetëm 3 euro për KGOE. Më dobët performojnë Kosova dhe Serbia, me përkatësisht 2 dhe 2.1 euro ndikim në PBB për 11.6 kWh të konsumuara.

Sipas statistikave, vendi ynë është përmirësuar ndjeshëm në këtë tregues gjatë dekadës së fundit, duke e rritur gradualisht performancën nga 2 euro për KGOE në vitin 2005.

Pavarësisht raporti pozitiv me rajon, Shqipëria është ende larg niveleve të vendeve të Bashkimit Europian, i cili ka një mesatare prej 8.3 euro për KGOE. Irlanda mban rekordin për prodhueshmërinë e energjisë, me 16.8 euro ndikim në PBB, ndjekur nga Danimarka me 15.4 euro.

Performancën më të dobët në të gjithë Europën, e ka Islanda, me vetëm 2 euro, po aq sa Kosova, vend i cili gjatë dekadës së fundit, për shkak të arritjeve në shfrytëzimin e energjisë gjeotermike, ka rritur ndjeshëm konsumin elektrik, duke u bërë vendi që konsumon më tepër energji për frymë në botë.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.