Prodhuesit e qumështit: Do shkojmë drejt falimentit! – Shoqata 4 kërkesa qeverisë: Ulni TVSH-në, hiqni akcizën e gazit, subvencion fermerëve
Shoqata “Industria e Përpunimit të Qumështit” i është drejtuar Qeverisë të ndërhyjë urgjentisht për të adresuar problematikat e forta që has ky sector.
Përmes një daljeje në media, Shoqata është shprehur se është e domosdoshme ndërhyrja e menjëhershme në këtë sektor, duke ngritur një grup pune të përbashkët nga AKU (Autoriteti Kombëtar i Ushqimit), Drejtoria e Tatimeve, Polica Bashkiake dhe instanca të tjera shtetërore me përgjegjësitë përkatëse në ligjin e ushqimit.
Ky grup pune të bëjë të mundur formalizimin dhe standardizimin e të gjitha baxhove dhe njësive të përpunimit të qumështit në vendin tonë. Sekretari i përgjithshëm i Shoqatës, Donjaldo Hoxha, paraqiti katër kërkesat ndaj qeverisë, të cilat konsistojnë në reduktimin e TVSH-së për produktet, subvencionim për çdo litër qumësht të prodhuar në vend, heqjen e akcizës së gazit që përdoret për prodhim, dhe rritjen e sigurisë së qumështit.
Kryetari i Dhomës së Tregtisë Tiranë Nikolin Jaka tha se ajo që kërkon Shoqata është trajtimi i barabartë i të gjithë aktorëve të këtij sektori. Shoqata ka paralajmëruar se Nëse qeveria nuk plotëson kushtet e përmendura më sipër fermerët dhe prodhimi i qumështit shumë shpejt do falimentojë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.