Produktet e sigurimit – Ja cilat janë me fitim dhe cilat me humbje
Sigurimet motorike janë ndër produktet më fitimprurëse për kompanitë e sigurimeve, ndërsa sigurimi i aksidenteve dhe shëndetit po rezulton një aktivitet me humbje.
Sipas të dhënave nga Autoriteti i Mbikëqyrjes Financiare, për vitin 2016 bilanci i llogarisë teknike për sigurimet motorike rezultoi pozitiv në vlerën e 136 milionë lekëve.
Bilanci i llogarisë teknike tregon raportin total mes të ardhurave dhe shpenzimeve nga aktiviteti sigurues, pa përfshirë zërat e tjerë të bilancit. Për sigurimet motorike, bilanci ngelet me fitim, ndonëse këto fitimet kanë rënë ndjeshëm krahasuar me vitin 2016.
Ndërkohë, një klasë tjetër sigurimi që për vitin e kaluar solli fitime të mëdha për siguruesit ishte ajo e sigurimit ndaj zjarrit dhe forcave të natyrës. Vitin e kaluar, kompanitë e sigurimeve fituan 230 milionë lekë nga ky produkt, për herë të parë pas tre vitesh me humbje.
Nga ana tjetër, produktet që po japin në vazhdimësi bilanc me humbje për siguruesit janë sigurimet e aksidenteve dhe shëndetit, por edhe sigurimet kasko të automjeteve. Vitin e kaluar, produktet e sigurimit të shëndetit i sollën industrisë së sigurimeve humbje në vlerën e 19 milionë lekëve. Ky ishte i treti vit radhazi që bilanci nga këto produkte u mbyll me humbje.
E njëjta gjë mund të thuhet për sigurimet KASKO të automjeteve, që sollën humbje për të pestin vit radhazi, në shumën e 87 milionë lekëve.
Megjithëse shumë produkte për siguruesit rezultojnë me humbje, këto humbje nuk shkaktohen edhe aq nga pagesa e dëmeve, por, sidomos nga niveli i lartë i shpenzimeve të marrjes në sigurim dhe atyre administrative.
Tregu shqiptar i sigurimeve ka raporte mjaft anormale mes dëmeve dhe shpenzimeve kundrejt primeve të arkëtuara. Standardi i raportit dëme-prime në tregjet e sigurimeve është në intervalin mes 50% dhe 80%. Për tregun shqiptar të sigurimeve të jo-jetës ky raport është shumë më i ulët, në më pak se 30%. Përkundrazi, raporti mes shpenzimeve dhe primeve vitin e kaluar ishte afro 67%, ndërkohë që duhet të jetë në intervalin mes 25% dhe 50%.
Pra, në thelb kompanitë shqiptare shpenzojnë më shumë për agjentët e shitjeve dhe për nevojat e tyre administrative, sesa për të dëmshpërblyer të siguruarit.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.