Profesionistët në Itali në shesh për një kompensim të drejtë
Avokatë, arkitektë, inxhinierë, mjekë, juristë, veterinerë, dentistë dhe shumë profesionistë të tjerë marshuan sot në Romë me disa kërkesa për qeverinë.
Kryesorja për ta është rikthimi i tarifave minimale, të cilat u hoqën në vitin 2006 si zgjidhje e ligjvënësve për të respektuar legjislacionin europian ku parashikohej liberalizimi i fushës së shërbimeve profesionale.
Por profesionistët mendojnë se kjo nuk bie në kundërshtim me rregullat europiane dhe thonë se Gjykata e Drejtësisë Europiane u ka dhënë së fundmi të drejtë. Tashmë ata shprehen se janë të gatshëm të rinegociojnë tarifat me qeverinë dhe ministritë përkatëse, por është një problem që kërkon zgjidhje të menjëhershme.
Heqja e tarifave minimale në vitin 2006, sipas tyre, ka sjellë vetëm zhvlerësimin e punës së tyre. Një sistem që synon cilësinë, si ai i botës së profesionistëve në Itali, që përbën 13% të PBB, duhet të ketë disa masa mbrojtëse, të cilat në këtë rast janë tarifat.
Të ardhurat e këtij grupi kanë rënë ndjeshëm dhe janë kthyer në nivelet e viteve ’80. Nga viti 2007 në vitin 2014 ka patur një rënie të ardhurash prej 22%.
Eventi #noiprofessionisti lindi si një iniciativë e rendit të avokatëve, të inxhinierëve, të arkitektëve dhe të mjekëve të romës, por në pak javë u shndërrua në një manifestim kombëtar me mbi 140 urdhra që i janë bashkuar marshimit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.