Profili i rrezikut të Shqipërisë, raporti i “Coface”: Biznesi në rrezik të lartë falimenti, investimet të dobëta
Shqipëria cilësohet si një vend me rrezik të lartë për biznesin. Në këtë përfundim arrin një raport i fundit i kompanisë franceze të sigurimit të tregtisë, “Coface” dhe që merret ekskluzivisht me sigurimin e kompanive të tjera ndaj rreziqeve të falimentit.
Ky raport i jep Shqipërisë notën C, sa i përket rrezikut të falimentit, ç`ka përkthehet në rrezik të lartë, gjë që ilustrohet në hartë me ngjyrën portokalli. Në Europë, veç Shqipërisë, vetëm Bosnje Hercegovina, Ukraina dhe Bjellorusia kanë një rrezik kaq ta lartë, ndërkohë që Kosova ka rrezikun në shumë të lartë, një shkallë nën nivelin ekstrem.
Raporti merr ne analizë edhe ekonominë shqiptare, duke i kushtuar një profil të caktuar.
“Rritja do të vazhdojë të jetë e lartë përgjatë 2018-ës, duke përfituar nga vijimi i investimeve të huaja në infrastrukturë, kryesisht në energji, me “Tap” dhe “Moglicën”, thuhet në raport, ku projektohet edhe një rritje e ekonomisë shqiptare me 3.9% këtë vit.
Më tej, thuhet se, investimet e brendshme do të jenë të dobëta, si pasojë e konsolidimit fiskal që pritet të rinisë këtë vit, por edhe si pasojë e kujdesit të bankave. Remitancat, thuhet më tej, mund të rriten, në linjë me ecurinë e ekonomisë italiane, thuhet më tej në raport.
Një paragraf i veçantë i rezervohet reformave, që priten të vijojnë këtë vit, pas vitit elektoral. Procesi i integrimit në Bashkimin Europian do të ushqejë axhendën e reformave thuhet më tej.
“Shumë mbetet për t`u bërë, për të përmirësuar eficencën e administratës, për t`i bërë agjencitë lokale më të përgjegjshme, për të luftuar korrupsionin, krimin e organizuar, si dhe trafikun mes Shqipërisë dhe Italisë”, mbyllet raporti për vendin tonë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.