Programe me pronat e konfiskuara të krimit – Pasuritë për mbrojtjen e dëshmitarëve e bashkëpunëtorëve të drejtësisë dhe viktimave
Me pasuritë e konfiskuara të krimit e korrupsionit do të krijohet një fond i posaçëm, përmes të cilit do të financohen projekte për mbrojtjen e dëshmitarëve e bashkëpunëtorëve të drejtësisë ashtu si dhe viktimave të kriminalitetit. Më 18 nëntor Këshilli i Ministrave ka miratuar një udhëzim me qëllim përcaktimin e rregullave, procedurave dhe afateve, që duhet të ndiqen në procesin e përzgjedhjes së projekteve që do të financohen nga Fondi i Posaçëm për Parandalimin e Kriminalitetit.
Fondi i posaçëm do përdoret në 5 shtylla: së pari, për Përmirësimin e funksionimit të drejtësisë penale, duke destinuar pasuritë në administrim të Prokurorisë së Posaçme Kundër Korrupsionit dhe Krimit të Organizuar, Ministrisë së rendit dhe të Ministrisë së Drejtësisë;
Së dyti, për Përmirësimin e parandalimit të kryerjes së veprave penale, të hetimeve paraprake penale të krimit të organizuar ose të krimeve të tjera, që sjellin pasuri/produkte kriminale dhe zhvillimin e programeve të mbrojtjes së dëshmitarëve e të bashkëpunëtorëve të drejtësisë, duke destinuar pasuritë në administrim të ministrisë përgjegjëse për rendin dhe sigurinë publike;
Së treti për Dhënien e ndihmës viktimave të krimit të organizuar dhe të trafikimit, familjarët e punonjësve të Policisë së Shtetit të rënë në krye të detyrës, si dhe nxitjen e programeve sociale për këto kategori, duke destinuar pasuritë në administrim të Ministrisë së Rendit dhe asaj të Ccështjeve Sociale
Së katërti, për Dëmshpërblimin e viktimave të krimit të organizuar dhe të trafikimit në masën e përcaktuar me vendim gjyqësor;
Dhe së pesti, Për mbulimin e diferencave në vlerë që mund të krijohen nga administrimi i pasurive, të cilat me vendim gjyqësor i kthehen pronarit të pasurisë së sekuestruar ose të konfiskuar.
Kërkesat për financimin e projekteve, paraqiten pranë Agjencisë së Administrimit të Pasurive të Sekuestruara dhe të Konfiskuara, e cila për shqyrtimin dhe vlerësimin e dokumentacionit përkatës të kërkesave do të ngrejë një grup të posaçëm pune.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.