Programet ekonomike të partive – Sondazhi me bizneset: 76% janë mosbesues Konfindustria: Partitë të jenë më të përgjegjshme
Në prag të zgjedhjeve të 25 prillit, partitë politike kanë shpalosur disa prej pikave kryesore të planeve ekonomike, ku përballja kryesore duket se qëndron te sistemi i taksimit. Partia Socialiste është e vendosur të vazhdojë me taksimin progresiv, ndërkohë që Partia Demokratike synon rikthimin e taksës së sheshtë, por në nivelin 9%. Demokratët premtojnë edhe uljen e nivelit të sigurimeve shoqërore nga 23.9% në 18%. Ndërkaq, PD premton rritjen e pagës minimale në 36 mijë lekë, ndërsa PS në 40 mijë lekë, nga 30 mijë lekë që është aktualisht.
Sipas Partisë Demokratike totali i taksave dhe tarifave vendore i bizneseve të vogla e të mesme nuk do të jetë më i lartë se 0.5% e xhiros, ndërsa PS do të vazhdojë me përjashtimin nga tatim-fitmit për bizneset me të ardhura deri në 8 mln lekë, subjektet me qarkullim nga 0 deri në 2 milionë lekë, do paguajnë 25,000 lekë në vit tatim të thjeshtuar mbi fitimin, ndërsa subjektet me qarkullim vjetor nga 2 deri në 8 milionë lekë në vit do vazhdojnë të paguajnë 7.5% të fitimit të tatueshëm, si tatim të thjeshtuar të tatimit mbi fitimi. Por, teksa partitë prezantojnë programet ekonomike, bizneset shfaqen mosbesues në drejtim të zbatimit të tyre.
Sipas një sondazhi të kryer nga Qendra e Studimeve të Konfindustrisë, 76% e bizneseve deklarojnë se nuk kanë besim ose kanë shkallë shumë të ulët besimi mbi premtimet/programet poltike. Ndërkohë që, në lidhje me nxjerrjen nga skemat e pagesave të detyrimeve fiskale të kategorive të biznesit të vogël, 69% e bizneseve të pyetura u përgjigjën, që janë të dëmshme ekonomikisht në afatgjatë, prishin konkurencën e lirë në treg dhe do shtojnë informalitetin. Sondazhet përfshinë periudhën shkurt-java e parë e marsit 2021, ndërsa në vlerësim u përfshirë 143 biznese të kategorive të mesëm dhe të mëdhënj në Qarqet Tiranë, Durrës, Elbasan, që i përkasin sektorëve të: industrisë, prodhimit, shërbimeve, agroindustrisë, etj. Ndërkaq, Konfindustria, duke marrë shkak edhe nga përfundimet e mësipërme, u bën thirrje partive politike të jenë më të qartë, të përgjegjshëm dhe profesionalë në programet ekonomike, që i ofrojnë qytetarëve dhe sipërmarrjes shqiptare në zgjedhjet e 25 prillit.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.