Programet lehtësuese në Eurozonë – Tre prej bankave kryesore paralajmërojnë për krijimin e një flluske

Tre prej bankave qendrore kryesore të Europës kanë dhënë sinjale për rrezikun e flluskave financiare, gjë që vjen prej politikave monetare lehtësuese.  Banka Qendrore Europiane, Bundesbank dhe Banka Qendrore e Danimarkës, kanë vënë në dukje disa cënueshmëri, që variojnë nga çmimet e larta të pronave në disa vende e deri te huadhënia e tepërt nga disa banka.

Kritikët e lidhin këtë me normat e ulëta të interesit të bankave, që synojnë nxitjen e huadhënies dhe pranimit të rrezikut, si dhe injektimit të parasë në sasi gjigante, si ç’është programi prej 2.55 trilionë euro i Bankës Qendrore Europiane.

Gjermanët në veçanti, kanë thënë prej kohësh se stimujt e tejzgjatur rrezikojnë të dëmtojnë ekonominë.  “Rreziqet janë akumuluar, kryesisht gjatë periudhës së tejzgjatur të normave të ulëta të interesit”, paralajmëroi Bundesbank në raportin mbi stabilitetin. Bundesbank nuk ka autoritet në politikat monetare të Eurozonës.

Çmimet e shtëpive në Gjermani janë rritur me mbi 30% dhe përfitueshmëria e bankave është përkeqësuar, gjë që mund të nxisë huadhënësit që të pranojnë më shumë rrezik në këmbim të kthimeve më të mëdha.

Danimarka, pavarësisht se nuk është në Eurozonë, dha paralajmërime të ngjashme.  “Shumë banka kanë ulur standardet e kreditit dhe kanë dhënë hua ndaj klientëve problematikë”, deklaroi kreu i Bankës së Danimarkës, Lars Rohde.

Programi i BQE po arrin vitin e katërt,  pavarësisht se ekonomia ndodhet në performancën më të mirë në një dekade dhe aktivet financiare janë në nivele rekord të larta.

Dilema e bankës është se vendet e pasura të Eurozonës nuk kanë më nevojë për stimuj të këtij kalibri, ndërsa vendet mesdhetare si Italia, Greqia dhe Spanja, sapo kanë nisur t’i bashkohen rimëkëmbjes së rajonit, që ka treguar rritje për 18 tremujorë radhazi.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.