Programi 100 fshatrat – 2 milionë euro investime, mbështetje me grante për disa kategori
100 fshatra në të gjithë vendin që kanë potenciale turistike, por jo vetëm, do të mbështeten me qëllim zhvillimin e tyre ekonomik dhe rritjen e punësimit. Programi 100 fshatrat, përzgjedhja e të cilave tashmë është bërë, parashikon ndërhyrjen e qeverisë në infrastrukturë dhe shërbime, por edhe financim përmes me granteve.
“Këto fshatra kanë një efekt tërheqës dhe potenciale të larta në turizëm, pra në zhvillim turistik, në zhvillim socio-ekonomik, kanë pasuri dhe burime natyrore dhe mjedisore të shumta, të trashëgimisë kulturore, të produkteve tradicionale. Pra janë ato fshatra që kanë kurorën e zhvillimit rural të vendit tonë. Kështu që me këto fshatra do të punojmë fort në këto tre vite. Paketa e projekteve do mbështesim për secilin fshat, përfshin ndërhyrjen në infrastrukturë, mbështetje ekonomike me grante nga ministria, por edhe trajnime dhe mbështetje për komunitetin lokal”.
Sa i përket mbështetjes së individëve dhe fermerëve, do të ketë disa kategori që do të mund të jenë përfitues, si nga buxheti i shtetit por edhe nga donatorët. Në total, llogaritet që vetëm nga Ministria e Bujqësisë, të investohen rreth 2 milion euro.
“Ajo që është më e rëndësishme, është mbështetja që do të përfitojnë me subvencione fermerët në këto 100 fshatra. Bëhet fjalë për mbështetjen që do të bëjmë për punishtet prodhuese të produkteve tradicionale. Kemi një paketë për mbështetjen e të rinjve në biznese start-up. Do të ngrihen inkubator, do mbështetet ngritja e agroturizmeve të reja. Kemi mbështetje për bujtinat, për të rritur kapacitetet në to. Pra është një paketë investimesh, që në total vetëm nga buxheti i ministrisë së bujqësisë shkon në 2.5 milionë euro”.
Programi 100 fshatrat është bërë pjesë e strategjisë së Ministrisë së Bujqësisë 2018-2020. Këshilltari i Ministrit të Bujqësisë, Enea Hoti, ka bërë me dije edhe disa nga fshatrat e përzgjedhur si përfitues nga projekti.
“Në Tiranë ne kemi fshatin Shëngjergj, Pezë, Shesh, por është edhe Voskopoja, Dardha, Thethi, Drishti, Fishta, pra janë fshatra të cilat kanë një potencial të madh zhvillimi”.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.