Programi “100 fshatrat” – Peleshi: Do ta pasurojmë këtë listë me fshatra të tjerë përmes konkurrimit

Ministri i Bujqësisë dhe Zhvillimit Rural, Niko Peleshi ka zhvilluar takim të posaçëm sektorial, i pari për vitin 2018 me fokus mbështetjen e fermerëve me fonde bujqësore. Sipas ministrit Peleshi, fermerët  mund të aplikojnë për fonde pranë sporteleve të reja unike, agropikave, me 0 dokumente.

“Çdo fermer do të ketë mundësi që të aplikojë pa paraqitur asnjë dokument, por vetëm duke plotësuar një formular me të dhëna. Do i drejtohen agro-pikave, që janë sportele unike ku AZHBR do të jetë më pranë fermerëve që këta të dinë si të përfitojnë dhe të marrin ndihmë nga fondi i garancisë. Aplikimi do të bëhet pranë këtyre sporteve. Pastaj vetëm fituesit do të duhen të vetëtojnë ato që kanë shkruar në formular. Kjo kursen kohë, para dhe mundin që i duhej një fermeri për të plotësuar dosjen me 13 dokumente që duhej më parë.”

Ai tha Bashkimi Europian ka akorduar në sektorin e bujqësisë një financim prej 71 milionë eurosh dhe qeveria shqiptare dhe qeveria shqiptare do të ofrojë 23 milionë euro. Ministri është ndalur gjithashtu edhe te produktet e përzgjedhura mbi të cilat do të mbështetet kjo skemë, që do të jenë 15 të tilla, ndër to: bimët mjekësore, domatja, kastraveci, molla, bostani, ulliri, vreshtaria, speci, lajthia, arra, gështenja, lakra, lulelakra.

Ndërkohë, ai ka vijuar më tej me ndarjen e fondeve që do të shpenzohen në secilin drejtim. Sipas tij, prioritet do ti jepet mbjelljes së pemëve të reja, drurëve frutorë, serrave diellore ku do të investohen rreth 7 milionë dollarë. Sa i takon investimeve në grumbullim dhe përpunim, Peleshi tha se në këtë drejtim janë parashikuar rreth 7.3 milionë dollarë, ndërsa 3.2 milionë dollarë do të shkojnë për agroturizmin.

Sa i takon “Programit të 100 fshatrave”, Peleshi tha se përzgjedhja e tyre është bërë mbi bazën e zhvillimit të tyre.

“Kemi përzgjedhur fshatrat që kanë treguar zhvillim në këto vite me forcat e veta, kanë treguar shenja apo janë zhvilluar përmes prodhimeve tipike, festave. Përzgjedhja është subjektive sepse është bërë nga njerëzit.”

Por, ministri ka vijuar më tej se ky program do të përmirësohet dhe do të niset një fazë e dytë e tij, e cila do t’ju japë mundësinë edhe fshatrave të tjera që t’i bashkangjiten listës me 100 fshatra, duke aplikuar.

“Do ta pasurojmë këtë listë përmes një konkurrimi me apliki9m nga fshatrat që duan t’i shtohen kësaj liste. Them me aplikim sepse kushti që të zhvillohet kushti që të zhvillohet një fshat është komuniteti. Kjo është premisa e parë për të ndërtuar një program zhvillimi.”

Genta Dobra/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.