Programi 2021-2025, Rama: “I morëm qytetarëve 1mld$ më pak në taksa. Ndihmojmë biznesin e vogël dhe vijojmë me rritjen e pagave”
Kryeministri Rama është ndalur te ekonomia në prezantimin e programit Shqipëria 2021-2025, që ai e ka quajtur një plan veprimi me objektiva financiare të arritshme dhe të llogaritura nga ekspertët. Rama është ndalur me shifra konkrete duke sjellë në vëmendje një nga debatet kryesore që po zhvillohet mbi programet ekonomike të partive politike, ajo se cili sistem taksash do ti shërbejë më shumë vendit, progresive apo e sheshtë.
Opozita e bashkuar shprehet se taksa e sheshtë është ajo që do ti japë frymë vendit dhe do të sjellë më shumë investime të huaja duke e bërë vendin atraktiv, ndërsa qytetarët do të paguajnë më pak.
Mirëpo kryeministri ndan mendimin se taksa e sheshtë do ti marrë frymën punonjësve në privat dhe publik me të ardhura më poshtë se 1.2 mln lekë, ndërkohë që favorizon ata që fitojnë më shumë.
‘Në 8 vjet janë 1 mld $ që nuk i ka mbledhur më shteti nga 2014 por i ka lënë në xhepin e çdo të punësuari në Shqipëri.Ndërkohë më të pasurve nuk do u marrin më 15%, por do u marrin njësoj si atyre që paguhen shumë më pak e fitojnë shumë më pak, sepse kjo është taksa e sheshtë.’ – u shpreh Rama.
Rama sulmoi programin e PD duke deklaruar se duan t’iu fusin duart qytetarëve thellë në xhep, ndërsa për akuzat në drejtim të tij ku cilësohet si ortak i oligarkëve, Rama shprehet se prej tyre ka mbledhur më shumë taksa sesa është bërë ndonjëherë në qeverisjen e PD. Sipas kryeministrit është e padrejtë ulja e taksës në nivel të njëjtë si për një biznes të vogël edhe për një të madh.
“Do iu falin 200 mln dollarë nga arka e shtetit. Pastaj kismet si ndahet ky 200 mln dollarëshi që në një mandat avullon për të pikuar mes tyre(oligarkëve) dhe pushtetit, në vend se të shkojë për investime publike dhe rritje pagash në shërbim të popullit.”
Më tej, Rama ka prezantuar edhe premtimet konkrete si rritja e pagave për administratën, por jo për kabinetin qeveritar:
“Pagat e administratës publike do rriten me 30%, ndërkohë që pagat e deputetëve dhe ministrave as nuk janë rritur dhe as do rriten deri në 2025. Zero taksë për biznesin e vogël deri më 2029. Biznesi i vogël 200 mld dollarë kursime nga heqja e taksës së sheshtë. Taksa e sheshtë është armiku i kujt fiton më pak. Sot TVSH zero deri në 100 mijë dollarë. Rrini drejt dhe na mbështesni në rrugën e re që kemi hapur me zero taksë.”- deklaroi Rama.
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.