Programi i blerjes i BQE – Pritet të vazhdojë për 9 muaj të tjerë, me volum të përgjysmuar
Zyrtarët e Bankës Qendrore Europiane po konsiderojnë përgjysmimin e blerjes mujore të obligacioneve duke nisur nga Janari si dhe të mbajnë programin efektiv për të paktën 9 muaj.
Sipas burimeve, ulja e programit të lehtësimit sasior në 30 miliardë euro në muaj, nga vlera aktuale prej 60 miliardë, është një opsion që po konsiderohet.
Politikëbërësit, me në krye Mario Draghin, do të bëjnë të ditur më datë 26 Tetor detajet se sa do të reduktohet programi i blerjes së titujve të borxhit. Shumë anëtar në bordin drejtues të BQE, kanë përmendur rimëkëmbjen ekonomike të kohëve të fundit për të ndaluar akomodimin monetar, që ka zgjatur për dy vite e gjysmë.
Debati në takimin e radhës do të jetë nëse afati i programit të lehtësimit sasior do të lihet i hapur, duke i dhënë mundësi institucionit që ta zgjerojë përsëri, apo për të deklaruar kohën e përfundimit të tij.
Disa zyrtarë, përfshirë ato në Gjermani, kërkojnë që banka të deklarojë përfundimin e blerjeve, ndërsa të tjerë argumentojnë për një lloj fleksibiliteti, në mënyrë që institucioni të mund të zgjerojë lehtësimin monetar në rast të ndonjë përkeqësimi të situatës.
Ndërkohë që institucioni në Frankfurt ka deklaruar se normat e interesit do të qëndrojnë në nivel rekord të ulët deri sa programi i blerjeve të përfundojë, zgjerimi i afatit shtyn edhe mundësinë e rritjes së interesave, që do të ishte lëvizja e parë që prej vitit 2011.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.