Programi i vaksinimit në Kinë / Do të përfshijë adoleshentët këtë muaj dhe fëmijët në Gusht
Shumë zona në kinë do të nisin të vaksinojnë adoleshentët kundër Covid-19 këtë muaj, sipas mediave lokale, ndërkohë që vendi përshpejton fushatën e imunizimit. Kina, që i’a ka dalë të frenojë infeksionet e brendshme, ka administruar 1.4 miliardë doza të vaksinave, apo 2/5 e totalit botëror prej 3.47 miliardë doza. Këtë muaj, rajoni jugperëndimorë Guangxi, dhe qyteti Jingmen në provincën qendrore të Hubeit, do të nisë vaksinimin e atyre në moshë 15-17 vjeç, si dhe fëmijëve mes 12-14 vjeç në Gusht, sipas mediave lokale. Deri në fund të Tetorit, autoritetet synojnë të kenë vaksinuar plotësisht të gjithë njerëzit e përshtatshëm në grupmoshën 12-17 vjeç. Kina ka miratuar 2 vaksina të zhvilluar brenda vendit, një nga Sinovac dhe tjetrën nga Sinpharm, për adoleshentët dhe fëmijët. Vendi me popullsinë më të madhe në botë, me 1.4 miliardë, nuk shpalos rregullisht se sa njerëz janë vaksinuar plotësisht, por në fund të muajit të kaluar, një televizion shtetërorë theksoi se norma kombëtare ka kaluar 40%. Kina pritet të vaksinojë të paktën 70% të grupeve të shënjestruara deri në fund të vitit, sipas Komisionit Kombëtar të Shëndetit.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.