Progres me “pastrimin e parave” Moneyval: ”Shqipëria përmirësohet në 6 rekomandime kryesore!”
Këshilli i Europës ka publikuar raportin më të fundit të “Moneyval” për vendin tonë, ku vë në dukje progresin e bërë në 6 rekomandime. “Moneyval” është komiteti i ekspertëve për të vlerësuar masat kundër pastrimit të parave dhe financimit të terrorizmit.
“Si rezultat i progresit të Shqipërisë në forcimin e kornizës për të luftuar pastrimin e parave dhe financimin e terrorizmit që prej raportit të përbashkët të vlerësimit në Korrik të vitit 2018, Moneyval ka rivlerësuar vendin në 5 rekomandime si pjesërisht të pajtueshme dhe në një si gjerësisht të pajtueshme”, thuhet në raport.
Përputhshmëria i referohet afrimit me rregullat europiane. Rekomandimi i 6-të, që i referohet sanksioneve financiare ndaj shteteve apo entiteteve të huaja, është një ndër rekomandimet e rishikuara në rritje, tashmë me notën e “pajtueshme”. Rekomandimi numër 8-të, që i referohet mbikqyrjes së shoqatave jo fitim-prurëse, kryesisht për rrezikun e financimit të terrorizmit gjithashtu është parë në rritje, nga pjesërisht e pajtueshme, në gjerësisht e pajtueshme. Rekomandimi numër 18 i referohet sistemi financiar, ku nota është ndryshuar nga pjesërisht e pajtueshme në gjerësisht e pajtueshme. Vlerësimi vjen për institucionet financiare, jo bankare, dhe përtej kompanive të sigurimit, pasi në këtë rast pajtueshmëria ka qënë që në raportin e kaluar. Institucionet financiare janë të detyruara të transmetojnë informacione në raste dyshimi te autoritetet përkatëse por edhe të kenë grupe të brendshme auditi si dhe të trajnojnë punonjësit.
Tashmë, ky detyrim shkon përtej bankave dhe kompanive të sigurimit, gjë që merr vlerësimin e Këshillit të Europës. Edhe rekomandimi numër 21 i referohet institucioneve financiare, kryesisht bankave, për mënyrën e transmetimit të informacionit. Edhe këtu progresi është i ndjeshëm, dhe tashmë Shqipëria klasifikohet si e pajtueshme. Raporti vë në dukje se progres është bërë edhe në rekomandimet e tjera të cilat nuk janë rivlerësuar me notë. Vetëm pak kohë më parë, më 13 Shtator të vitit të kaluar, Këshilli Europian vendosi ta heqë Shqipërinë nga lista gri e juridiskioneve jo-bashkëpunese për çështjet e taksave.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.