Progres minimal me sundimin e ligjit – Shqipëria e 68-ta në botë, korrupsioni vazhdon të na “nxijë”
Shqipëria ka fituar 4 pozicione në “Indeksin e sundimit të ligjit 2017-2018”, i publikuar nga Projekti për Drejtësi në Botë, që është një ndër organizmat më në zë në këtë drejtim.
Në raportin e këtij viti, të sapopublikuar, vendi ynë pozicionohet i 68-ti ndër 113 vende të ndryshme të botës. Në rajon ndërkohë, pra në Europën lindore dhe Azinë qendrore, Shqipëria renditet e 6-ta ndër 13 vende, duke lënë pas ndër fqinjët vetëm Serbinë.
Por ndërkohë që Shqipëria fiton pikë në indeksin e përgjithshëm me nën-indikatorë si të drejtat themelore, humbet ndjeshëm pikë me nën-indikatorë të tjerë, si: korrupsioni.
Nën-indikatori që mat mungesën e korrupsionit e rendit Shqipërinë të 94-tën në botë, ndër 113 ekonomi. Vendi ynë është jo vetëm i fundit në rajon në këtë drejtim, por edhe vendi i tretë nga fundi në Europë, më mirë vetëm se Moldavia dhe Ukraina sa i përket korrupsionit, që vijon të mbetet një plagë e madhe në shoqërinë dhe ekonominë tonë, më shumë se në çdo vend tjetër të rajonit, duke qenë pranë niveleve të vendeve afrikane, apo Amerikës Latine. Gjithsesi, një vit më parë, Shqipëria renditej e 98-ta në botë në këtë indikator.
Sa i përket korrupsionit, në Shqipëri më problematiku vlerësohet legjislativi, më pas ndjek gjyqësori, ekzekutivi dhe në fund forcat e ruajtjes së rendit, paçka se, ky është i vetmi nën-indikator që ka pësuar rënie në pikëzim në krahasim me një vit më parë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.