Projeksionet e Bankës së Anglisë. Pritet rimëkëmbje më e ngadaltë nga Covid-19 në vitin e ardhshëm

Banka e Anglisë deklaroi gjatë javës se pret që ekonomia britanike të kërkojë më shumë kohë për t’u rikthyer në nivelet e para pandemisë, dhe paralajmëroi për rreziqet e mundshme të interesave nën zero.  Banka, pasi lajmëroi votimin unanim të politikëbërësve për të mbajtur interesat e pandryshuara në 0.1%, deklaroi se ekonomia nuk do të rimëkëmbet në nivelet e fundit të 2019-s deri në fund të vitit të ardhshëm.

Në muajin Maj, institucioni kishte bërë të ditur se ekonomia do të kalojë tërësisht krizën gjatë gjysmës së dytë 2021.  Megjithatë, projeksionet e Bankës së Anglisë për vitin 2020 ishin më pak të zymta se ato të muajit Maj. Norma e papunësisë pritet të arrijë majën prej 7.5% në fund të këtij viti, normë thuajse sa dyfishi i asaj aktuale, por më e ulët se vlerësimi i muajit Maj prej 10%.   Ekonomia në tërësi ndodhet tashmë në një kurs të rënies prej 9.5% këtë vit, që është performanca më e keqe në 99 vite, krahasuar me 14% rënie në skenarin e muajit Maj, që do të ishte niveli më i ulët në mbi 3 shekuj.

Megjithatë, Produkti i Brendshëm Bruto pritet të rimëkëmbet me 9% në vitin e ardhshëm, nivel më i dobët se 15% rritje që pritej më parë.   Banka e Anglisë deklaroi gjithashtu se po vlerëson nëse duhen çuar normat e interest në territory negativ.  Megjithatë, institucioni theksoi se një lëvizje e tillë, do të dëmtonte bilancet e bankave.

Klevis Llaha / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.