Projekt për pastrimin e parqeve – Ambasada e Japonisë financon mjete dhe pajisje
Bashkia e Tiranës dhe Ambasada e Japonisë kanë nisur projektin për pastrimin e parqeve të kryeqytetit.
Marrëveshja është nënshkruar nga Agjencia se Parqeve dhe Rekreacionit dhe Ambasada japoneze në Tiranë, dhe projekti mundëson shtimin e mjeteve dhe pajisjeve për pastrimin e Parkut të Liqenit Artificial dhe parqeve të tjera.
“Më vjen mirë që nga kjo marrëveshje marrim një donacion shumë të vyer për Agjencinë e Parqeve dhe Rekreacionit, si ndihmë për shtimin e pajisjeve, koshat dhe një sistem të modernizuar të pastrimit për parqet e Tiranës”, u shpreh Veliaj.
“Është një kënaqësi e madhe që firmos këtë projekt, i cili ka impakt të drejtpërdrejtë në përmirësimin e mjedisit në Tiranë. Me këtë rast dua të shpreh vlerësimin tim për kryetarin e Bashkisë dhe punën e tij të palodhur për krijimin e ‘Pyllit Orbital’, duke planifikuar mbjelljen e miliona pemëve të reja në Tiranë, e cila konsiderohet realisht si trashëgimia më e mirë për gjeneratën tjetër”, deklaroi Makoto Ito, Ambasador i Japonisë në Shqipëri.
Ndër të tjera, Kryebashkiaku Veliaj theksoi se bashkëpunimi me Japoninë do të vazhdojë edhe më tej për të shfrytëzuar përvojën e saj për zhvillimin e qëndrueshëm dhe inovacionin.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.