Projektet e reja për Vlorën nga Muzeu Kombëtar Hebraik te “karabinaja e lashtë e Sulos” që po bëhet qendër inovacioni digjital

Shumë shpejt në Vlorë do të hapet Muzeu Kombëtar Hebraik. Kjo u bë e ditur nga kryeministri Edi Rama gjatë vizitës që bëri në qendrën historike të Vlorës. Në garë për ndërtimin e Muzeut janë edhe projektues të huaj.

Ministrja e Kulturës Elva Margariti tha se muzeu do të jetë një vlerë që do t’i kalojë kufijtë. “Ne kemi përcaktuar me projektidenë të gjithë rikonceptimin e kësaj hapësire. Do të ketë dhe arkitektë të huaj që do të ftohen për të sjellë propozimet e tyre. Do të jetë një muze, i cili do t’i japë vlerë, jo vetëm Vlorës, jo vetëm Shqipërisë, por edhe në nivel rajonal” tha ajo.

E pozicionuar diku më tutje është karabinaja e lashtë e “Sulos” që po transformohet falë një projekti për ta kthyer në një qendër inovacioni digjital për të rinjtë, kulture, arti e hapësirash për të gjitha moshat.

“Do të kthehet në një objekt publik. Unë bëra një diskutim të gjatë me arkitektë që të jetë një qendër që të ketë disa komponentë. Një komponent të jetë për të gjithë proceset e IT-së për të rinjtë, në mënyrë që ta krijojmë rrjetin me bërthamën e nisur në Tiranë me “Tumo”-n, me Korçën që ka avancuar për ta patur këtë qendër për të rinjtë tek biblioteka e re.

Me Vlorën kemi një aset fantastik këtu, që mund të transformohet dhe t’u japim të rinjve mundësinë që të kenë akses në këtë aktivitet me procese ultra inovative, trajnimi me aktorë që i kemi në kontakt dhe të hymë në botën e kodimit dhe të gjithë shërbimeve globale online, që i japin mundësi që pa lëvizur nga vendi, pa lëvizur nga Vlora, të jenë të punësuar në tregun global me kompjuterin e tyre dhe të mund të kenë paga që shkojnë nga 1 mijë euro në vitin e parë deri në 5, 6, 9 apo 10 mijë, në varësi nga aftësia dhe nga kapaciteti i shërbimeve që kryejnë.

Kjo është e ardhmja në një pjesë të konsiderueshme të atyre që janë sot 14, 15 apo 16 vjeç, në sensin e punësimit. Përveç kësaj, sepse hapësira është fantastike, shumë e madhe, të ketë edhe hapësira për të moshuarit, për fëmijët, shërbime publike që janë të përqendruara dhe ofrojnë mundësi të drejtpërdrejta për qytetarët”, – u shpreh Kryeministri Rama lidhur me këtë projekt.​

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.