Projektet për depozitimin e gazit – Miratohen dokumentet, Shuli: Përveç terminalit të Vlorës, i hapet rruga çdo investitori!

Enti Rregullator i Energjisë ka miratuar 2 dokumente, që plotësojnë kuadrin rregullator për sektorin e depozitimit të gazit dhe i hapin rrugë çdo kompanie për të investuar në vendin tonë.

Gjatë diskutimeve në mbledhjen e fundit të Bordit të ERE-s, u deklarua se rregullorja e përdorimit të terminalit të gazit të lëngshëm, që është një prej dokumenteve të miratuar, vjen në mbështetje të marrëveshjes së nënshkruar mes Ministrisë së Infrastrukturës dhe Energjisë dhe kompanisë Exxon Mobile, për terminalin e GNL në Vlorë dhe ndërtimit të tubacionit për lidhjen me TAP.

Paralelisht, u miratua edhe metodologjia për përcaktimin e tarifës së depozitimit të gazit natyror, teksa një vëmendje e veçantë iu kushtua edhe rezervës strategjike e gazit, që aktualisht nuk është e parashikuar në ligj.

Duke mbajtur në konsideratë faktin se rregullorja e terminalit po miratohet në kushtet e mungesës së tregut të gazit në vendin tonë, anëtarët e bordit të ERE-s deklaruan se ajo mund të jetë objekt rishikimi, teksa sipas anëtarit të Bordit, Maksim Shuli, në fokus është edhe terminali i LNG me shkallë të vogël.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.