Projekti i ri për “Piramidën”, së shpejti nis puna për transformimin e saj – Do të kthehet në një qendër kulturore për rininë
Brenda këtij viti do të nisë puna për Piramidën, për ta kthyer në një qendër të madhe kulturore për rininë në Tiranë.
Deklarata është bërë nga kryebashkiaku, Erion Veliaj, ku ndër të tjera pohoi se: “Ne duam që aty të përfshijmë aktivitete që kanë të bëjnë me artin, kulturën, librin. Siç kemi bërë këto dy vitet e para për fëmijët, mund të plotësojmë një vakum për adoleshentët duke iu kthyer Piramidën”, u shpreh Veliaj.
Në fjalën e tij Veliaj foli edhe për rritjen e numrit të turistëve në Tiranë.
“Sot Tirana ka 2.5 herë më shumë turistë se sa dy vite më parë dhe ky bum turistësh nuk vjen nga hiçi, por vjen si pasojë e investimeve. Turistët kanë kërkuar turizmin religjioz, kulturor atë që ndodh çdo ditë në shesh, deri te ata që kanë nostalgji për të kaluarën komuniste”
Sipas Veliajt një pjesë e buxhetit të ri do të shkojë për rregullimin e qendrave të fshatrave, por nuk la jashtë vëmendjes edhe ndërtimin e shkollave të reja brenda këtij vitit.
“Një pjesë e buxhetit të ri do të shkojë për të rregulluar qendrat e fshatrave. Me dinjitet mbajtëm fjalën, kemi ndërhyrë në pjesën më të madhe të shkollave dhe hapëm edhe shkolla të reja. 16 shkolla të tjera do të ndërtohen në Tiranë këtë vit, me qëllim që t’i japim fund mësimit me dy turne”, pohoi Veliaj.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.